Aqparat jáne qoǵamdyq damý ministri Aida Balaeva jýrnalisterge alǵys aitty, dep habarlaidy QazAqparat.
«Men shynynda da kásibilik tanyta bilgen jýrnalisterge alǵys aitýdan sharshamaimyn. Olar óz ómirlerin de qaýipke tige otyryp, elimizdiń eń kúrdeli kezeńderine qatysty aqparat berip otyrdy. Elde tótenshe jaǵdai jariialanǵan kezde memleket qolǵa alyp jatqan sharalardy qamtyp aqparat berip, qoǵamda dúrbeleń týyp ketpeýine atsalysty», - dedi Aida Balaeva OKQ-da ótken baspasóz máslihatynda.
Ministr pandemiia alǵash bastalǵan kezde adamdar virýstyń baryna senbegenin de jetkizdi.
«Sol sebepti bizdiń jýrnalister TJ jariialanǵan alǵashqy ýaqytta adamdardyń úiinde otyrýy úshin aqparat taratyp, kásibi biliktilikterin tanyta bildi. Jýrnalisterdiń bárine alǵys aita otyryp, barlyǵynyń densaýlyǵy myqty bolýy tileimin. Sebebi virýs quryp ketken joq. Búgin de jýrnalisterimiz basyn báigege tige otyryp, jumys júrgizip, halyqqa eń kerekti jáne shynaiy aqparatty jetkizýde», - dedi ol.
Aida Balaeva sonymen qatar elde koronavirýs órshigen kezde feik jańalyqtardyń da úlesi artyp ketkenin aitty.
«Jýrnalisterdiń eńbegi men kásibi biliktiliginiń arqasynda bizdiń el feik jańalyqtary eń az memleket retinde reitingtiń bas jaǵynan kórindi. Feikter jalpy qoǵamda dúrbeleń týǵyza alarlyq kúsh. Óz tarapymyzdan «Stop-feik» atty resýrs jasadyq. Búgingi tańda ol óte tiimdi jumys júrgizýde. 100-ge tarta feik jańalyqtar anyqtaldy. Eń bastysy ol jańalyqtarǵa qatysty jaýapty memlekettik organdar jedel jaýap berip otyr», - dedi ol.
