QR Aqparat jáne qoǵamdyq damý ministri Aida Balaeva memlekettiń jastardy qoldaýǵa baǵyttalǵan josparymen bólisti, dep habarlaidy "Ult aqparat".
«2025 jylǵa deiin jastardy qoldaýdyń keshendi jospary qabyldandy. Ol 10 baǵyttan turady jáne ár baǵyty jastardyń kókeikesti máselelerin sheshýge baǵyttalǵan. Onyń ishinde úi alý, jumysqa turý, sonymen qatar jumyspen qamtylmaǵan nemese oqymaityn jastar máselesi boiynsha naqty is-sharalar qarastyrylǵan. Jobalyq keńse uiymdastyrylǵan jáne onyń jumysy atalǵan máselelerdi júielep, sheshýge baǵyttalǵan. Bul máselelerdi zańdy turǵydan da sheshý qajet. Sol sebepti qoldanystaǵy zań jańartýdy talap etedi. Jyldyń basynda barlyq óńirde ministrlik kúnderin uiymdastyryp, osy máselelerge qatysty ashyq talqylaýlar ótkizdik. Onda jastardyń ózekti máselelerin sheshýge baǵyttalǵan usynystar aldyq. Olardyń barlyǵy saralanyp, keibiri zań turǵysynda sheshilse, endi biri josparǵa kirýi múmkin. Eń bastysy – jastar máselesin sheshý, jaǵdai jasaý», - dedi ministr Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, «Táýelsizdik urpaqtary» ulttyq jobasy aiasynda jastarǵa qatysty máselelerdiń barlyǵy úilestiriledi ári sheshiledi.
«Iaǵni, ár baǵyt boiynsha josparda is-sharalar, jumystar kózdelgen. Qoldanystaǵy zańymyzda jastar sanaty 14-ten 29 jasqa deiin dep belgilengen. Qazir jastardyń ómir súrý salty ózgerdi. Sondyqtan aldaǵy ýaqytta qabyldanatyn zańda jastar sanatyn 14-ten 35 jasqa deiin kóterý, úi alýlary úshin arnaiy baǵdarlama ázirleý máselesi kóterilip jatyr. Bul máselelerdiń barlyǵy jastardy qoldaý josparymyz aiasynda júzege asyrylady», - dedi Aida Balaeva.
