Buqaralyq aqparat quraldary qyzmetkerleri kúnine orai QR Premer-Ministriniń orynbasary – Mádeniet jáne aqparat ministri Aida Balaeva jýrnalisterdi kásibi merekemen quttyqtap, aqparat salasynyń qoǵamdaǵy róline toqtaldy, dep habarlaidy ult.kz.
Ministr óz quttyqtaýynda aqparat keńistiginiń qarqyndy ózgerip jatqanyn aityp, jańa tehnologiialar, áleýmettik jeliler, jasandy intellekt pen dipfeikter jýrnalisterge tyń mindetter júktep otyrǵanyn atap ótti.
Sonymen qatar ol kásibi jýrnalistikanyń negizgi qaǵidattary ózgermeitinin jetkizdi.
– Aýditoriianyń senimi, qoǵam aldyndaǵy adaldyq jáne jariialanǵan árbir aqparatqa degen jaýapkershilik – jýrnalistikanyń basty qundylyqtary bolyp qala beredi, – dedi Aida Balaeva.
Ministr Memleket basshysynyń «Qalam eldi túzeidi» degen sózin eske alyp, jýrnalistikanyń qoǵamdy uiystyrýdaǵy, aqiqatty jetkizýdegi jáne oń ózgeristerge bastaityn mańyzdy kúsh ekenin aitty.
Jańa Konstitýtsiia jáne BAQ-tyń róli
Aida Balaeva biyl el úshin tarihi mańyzy bar kezeń bastalatynyn atap ótti. Onyń aitýynsha, 1 shildeden bastap kúshine enetin jańa Konstitýtsiia zań ústemdigin nyǵaitýǵa, azamattardyń quqyqtary men bostandyqtaryn qorǵaýǵa, memlekettik institýttardyń ashyqtyǵy men jaýapkershiligin arttyrýǵa baǵyttalǵan.
Ministrdiń sózinshe, Ata Zańdaǵy ózgerister media salasynyń mańyzyn odan ári arttyrady. Konstitýtsiiada sóz bostandyǵy, azamattardyń shynaiy aqparat alý quqyǵy, derbes derekterdi qorǵaý jáne aqparat taratýdaǵy jaýapkershilikke qatysty mańyzdy qaǵidattar bekitilgen.
200 jýrnalist baspanamen qamtyldy
Ministrdiń málimetinshe, memleket aqparat salasy qyzmetkerlerin qoldaýǵa erekshe kóńil bólip keledi.
Sońǵy úsh jylda Astanada 200 jýrnalistke baspana berilgen. Al biyl elimizdiń barlyq óńirinen, onyń ishinde óńirlik buqaralyq aqparat quraldarynyń 66 qyzmetkerine páter kilti tabystalady.
Sóz sońynda Aida Balaeva jýrnalisterge adal eńbegi men kásibiligi úshin alǵys aityp, shyǵarmashylyq tabys, zor densaýlyq jáne otbasylaryna amandyq tiledi.
