Kazmedia ortalyǵynda ótken tarihi serialdardyń tanystyrylymynda QR Aqparat jáne qoǵamdyq damý ministri Aida Balaeva tarihi mazmundaǵy kontenttiń mańyzy týraly pikir bildirdi, dep habarlaidy QazAqparat tilshisi.
«Kino túsirý, sonyń ishinde tarihi mediaónim shyǵarý – bir sáttik qyzyq dúnie jasaý emes. Bul – joǵary sapany, tereń mazmundy qajet etetin kúrdeli sala. Sonyń ishinde ásirese tarihi serialdar – urpaq sanasyn qalyptastyratyn ideologiialyq qural. Sondyqtan da Memleket basshysy Qasym-Jomart Toqaev «Táýelsizdik bárinen qymbat» atty maqalasynda osy máselege erekshe nazar aýdarǵan bolatyn. Munyń ózindik máni bar. Táýelsizdiktiń qunyn bilip, onyń qadir-qasietin baǵalaý úshin biz ótkenimizdi umytpaýymyz kerek. Tarihta qandai joldardan óttik, qandai tulǵalar boldy? Bárin urpaqqa uǵyndyrý kerek. Sondyqtan da Prezident ult tulǵalaryn nasihattaityn tarihi serialdardy kóbeitýdi tapsyrdy. Osy serialdar arqyly biz óskeleń urpaqqa tarihi tulǵalar men olardyń ónegeli ómirin tanystyramyz», - degen Aida Balaeva Qazaqstan telearnasy túsirgen 6 tarihi serialdyń kórermen nazaryna jýyqta kógildir ekrannan usynylatynyn, negizgi baǵany sol kórermen beretinin atady.
«Árine, minsiz dúnie bolmaidy. Sondyqtan tek qana maqtaý kútip otyrmai, oryndy syn estýge daiynbyz. Ol óte mańyzdy. Sizderdiń ádil baǵalaryńyz, eskertýlerińiz, shynaiy pikirlerińiz arqyly kemshilikter anyqtalady, tájirie jinalyp, kelesi ónimderdiń sapasyn arttyrýǵa septigin tigizedi», - dedi ministr.
