Búgin Aqparat jáne qoǵamdyq damý ministrligi «Jańa jaǵdaidaǵy jastar: Is-qimyl kezeńi» respýblikalyq jastar bilim berý jobasyn iske qosty.
Atalmysh sharany ministrlik ókilderi Qazaqstan Jastar kongresimen seriktestikte respýblikanyń barlyq aimaqtaryn onlain formatta bailanystyra otyryp, júzege asyrdy, dep habarlaidy QazAqparat.
«Búgin elimizdiń jastary úshin erekshe shara. Árine, onyń mán-mańyzy týraly uzaq aitýǵa bolady. Biraq, men onyń bárin Elbasymyzdyń «Bizdiń maqsatymyz - jastardy jańa álemde ómir súrýge úiretý» degen bir ayz sózimen túiindegim kelip otyr. Óitkeni, «Zeren» jobasynyń basty maqsaty osy. Sondyqtan bul jobaǵa ómirin ónegemen órgen erekshe tulǵalar qatysyp, aqylyn aityp, kórgen-bilgenin úiretedi»,- dedi jobany iske qosýǵa arnalǵan saltanatty sharada sóz sóilegen QR Aqparat jáne qoǵamdyq damý ministri Aida Balaeva.
Ministr kelesi jyly elimiz Táýelsizdiginiń 30 jyldyǵyn atap ótkendigin aitty.
«Osy ýaqyttyń ishinde elimizde jańa da jasampaz urpaq qalyptasty. Bul sanasy erkin, júregi azat jastar. Sóz joq, olardyń jetistigi de, oi-órisi de ata-analarynan asyp túsedi. Desek te, ár zamannyń, ár ýaqyttyń ózi mindeti bar. Myna kelgen indet kórsetkendei, qazirgi jaǵdaida kóp másele kózqarasty qaita qaraýdy talap etip otyr. Árine, búgingi «Zeren» alańy osy baǵyttaǵy úlken jumysty atqarady degen senimdemiz. Bul shara jastarǵa bilim berýmen qatar olardyń qundy pikirlerin, keremet ideialaryn tyńdaý, qajetti qoldaý kórsetý maqsatynda uiymdastyrylyp otyr»,- dedi ol.
Sonymen qatar Aida Balaeva sanaly, bilimdi, belsendi jastary kóp eldiń bolashaǵy zor ekendigin basa aitty.
«Mundai jastar elimizdiń ár túkpirinen tabylady. Sol sebepti, jastar máselesin talqylaýdy búgingi bir ǵana is-sharamen shektelmei, búkil eldiń deńgeiinde jalǵastyrýymyz kerek. Óz tarapymyzdan biz Táýelsizdiktiń 30 jyldyǵy aiasynda barlyq óńirlerde jastar máselesi boiynsha tyńdaýlar ótkizýdi usynamyz. Sizderdiń ortaǵa salar oilaryńyzdy tyńdap, qajetti qoldaý kórsetýdiń mańyzy biz úshin zor. Óitkeni, qazirgi kezeń bul naǵyz is-qimyl kezeńi, jalyndy jastardyń ýaqyty, aryndy ul-qyzdardyń zamany», - dedi ministr.
Aita keteiik, b iylǵy jyly «Zeren» bilim berý lageri aiasynda onlain formatta ótip jatqan
joba aiasynda bir aidyń ishinde jas qazaqstandyqtar óz bilimin arttyryp, bilikti jattyqtyrýshylardy, sarapshylardy jáne ózge de shaqyrylatyn qonaqtardy jobaǵa tarta otyryp, jańa kóshbasshylyq jáne ómirlik qarim-qabiletterge ie bolady. Jumys bes negizgi baǵyt boiynsha júzege asyrylady: azamattyq belsendilik, eriktiler, aqparattyq tehnologiialar, jastar kásipkerligi jáne jeke damý.
Joba onlain-formatta júzege asyrylatyndyqtan oǵan elimizdiń túkpir-túkpirinen jastar ókilderi qatysa alady.
