Aqparat jáne qoǵamdyq damý ministri Aida Balaeva Qazaqstanda qoǵamdyq keńesterdiń róli edáýir artatynyn málim etti, dep habarlaidy QazAqparat.
OKQ alańynda Prezident Joldaýyn túsindirý barysynda ministr búgingi kúni normativtik-quqyqtyq aktilerdiń barlyq jobalary qoǵamdyq keńestermen mindetti túrde kelisýden ótetinin jetkizdi. Bul jurtshylyqty memlekettik sheshimder qabyldaý protsesine tartýǵa jáne ázirlenetin aktilerdiń sapasyn edáýir arttyrýǵa múmkindik beredi. Aida Balaeva qoǵamdyq keńester damýdyń jańa kezeńinen ótkerip jatqanyn aitady. Osylaisha, ministr qoǵamdyq keńester táýelsiz monitoring, barlyq áleýmettik mańyzdy taqyryptar boiynsha tyńdaýlar ótkizetinin atap ótti.
«Munyń barlyǵy qoǵamdyq keńes jumysynyń qajettiligi men múmkindigin ǵana emes, bul jobanyń kelesheginiń zor ekendigin de kórsetip otyr. Sondyqtan da qazirgi ýaqytta bul institýt jańǵyrýdyń jańa kezeńin bastap ótkerýde», - dedi Aida Balaeva.
Osyǵan bailanysty, ministrlik ázirlegen «Qoǵamdyq keńester qyzmetiniń máseleleri boiynsha keibir zańnamalyq aktilerge ózgerister men tolyqtyrýlar engizý týraly» zań jobasy aldyn ala úkimettik emes uiymdar men jurtshylyqtyń keńinen talqylaýynan ótip, qazir Parlament Májilisiniń qaraýynda jatyr. Ózgerister negizinen keńesterdi qalyptastyrý tetikterin jetildirýdi, qoǵamdyq keńes músheleriniń ókilettikterin toqtatýdy, qoǵamdyq keńesterdiń quqyqtary men ókilettikterin keńeitýdy kózdeidi.
«Iaǵni, qoǵamdyq keńesterdiń quzyretin keńeitý, atap aitqanda keńesterge normativti-quqyqtyq aktilerdi, jobalar men ótinishterdi qaraý týraly sheshim qabyldaityn quqyq beredi. Sondai-aq jergilikti deńgeide keńesterge quqyq qorǵaý organdarynyń basshylaryn esebin tyńdaý boiynsha ókilettik beredi», - dedi ol.
Budan basqa, memlekettik satyp alý boiynsha konkýrstyq komissiialarǵa qatysý arqyly qoǵamdyq keńesterdiń ókilettikteri keńeitilýde.
