Foto: Informburo.kz
Qazaqstan Respýblikasynyń Mádeniet jáne aqparat ministri Aida Balaeva respýblikalyq «Aiqyn» gazetine suhbat berip, kinematografiia salasyndaǵy memlekettik saiasattyń negizgi baǵyttaryna toqtaldy, dep habarlaidy Ult.kz.
Aida Balaeva sońǵy ýaqytta «Qazaqfilmge» qatysty túrli qaýeset pen syni pikir jiilep ketkenin atap ótti. Ministrdiń aitýynsha, bul máselege núkte qoiylatyn kez keldi.
«Biz «Qazaqfilmniń» burynǵy dańqyn qaita qalpyna keltirip qana qoimai, onyń jańasha damýyna, turaqty órkendeýine tikelei múddelimiz. Qazirdiń ózinde naqty qadamdar jasalyp jatyr. Zańnamalyq deńgeide memlekettik kinoqarjylandyrýdyń jalpy kóleminiń keminde 30%-y jyl saiyn «Qazaqfilmge» baǵyttalatyn tetik engizildi», – dedi ministr.
Ministrdiń málimetinshe, 2025 jyly kinostýdiiaǵa 336 million teńge bólingen. Sonymen qatar, qosymsha qarjylandyrý júiesi de keńeiip jatyr. Kino túsirýge nietti azamattar óz jobasy men qarjysynyń belgili bir paiyzyn, mysaly, 50 paiyzyn alyp kelse, «Qazaqfilm» qalǵan qarajatty bólip, birlesip jumys isteidi. Bul rette memleket qarjysynyń qaitarymy bolýy úshin prokattaǵy tabysqa eki tarap ta múddeli bolady. Ministr kino jobalardy irikteý rásimderiniń ashyqtyǵy men ádildigin arttyrýǵa erekshe nazar aýdarylatynyn da atap ótti.
«Memlekettik qarajat saraptaýdan ótken, laiyqty dep tanylǵan týyndylarǵa ǵana bólinedi. Sarapshylar quramy jańartylyp, irikteý kriteriileri naqtylandy. Bul – júieniń jetilý jolyndaǵy mańyzdy ózgeristerdiń biri», – dedi ol.
Sonymen qatar, «Qazaqfilm» ulttyq filmderdiń halyqaralyq deńgeide tanylýyna da kúsh salyp jatyr. Shetelde ulttyq kino kúnderin ótkizip, «Eýraziia» halyqaralyq kinofestivalin uiymdastyrý baǵytynda belsendi jumys istei bastady. Kinostýdiia alǵash ret ózin-ózi aqtaityn deńgeige jetti. Bul – basqarý sapasynyń artqanyn bildiredi.
Aida Balaeva kinostýdiianyń qazirgi basshylyǵyna qatysty syndarǵa da jaýap berip, bul kezeńde ujymdy shyǵarmashylyq tulǵa emes, kásibi menedjer basqarýy kerek ekenin atap ótti. Onyń aitýynsha, qazirgi basshy qysqa ýaqyt ishinde joǵary nátijelerge qol jetkizdi, alaida onyń jumysyna qatysty negizsiz syndar áli de aitylýda.
Suhbat barysynda ministr pitchingke kelip túsken ótinimderdiń sany artqanyn da sóz etti. Bul jas talanttardyń kóbeigenin bildiredi. Endi jobanyń ideiasyna ǵana emes, onyń prokaty men memlekettik qarjynyń qaitarymyna da basymdyq beriledi.
Memleket basshysynyń tapsyrmasy boiynsha 2030 jylǵa qarai kinoprokattaǵy ulttyq filmderdiń úlesin 35%-ǵa deiin jetkizý kózdelgen.
2024 jyly memlekettik qarjylandyrý aiasynda 16 ulttyq film prokatqa shyqty, biyl 6 film kórsetildi, jyldyń sońyna deiin taǵy 10-ǵa jýyq kartina kórermenge jol tartpaq.
Suhbat sońynda ministr shyǵarmashylyq qaýymdastyq ókilderin kásibilik pen ashyqtyqqa shaqyrdy.
«Mádeniet daý-damaidyń emes, tyń ideia men aýyzbirliktiń alańy bolýy kerek. Eger biz halyqaralyq deńgeide moiyndalatyn kino jasaǵymyz kelse, eń aldymen, óz ishimizde ádilettilikke, tártipke jáne ortaq jaýapkershilikke úirenýimiz kerek», – dedi ministr.
Mádeniet jáne aqparat ministrligi otandyq kinony turaqty qoldaýdy jalǵastyrady, maqsat – elde bar áleýetti júieli túrde qoldap, oǵan jol ashý.
