Foto: facebook.com/aqparatqogam
Mádeniet jáne aqparat ministri Aida Balaeva qazirgi ýaqytta internet keńistikte zańǵa qaishy, shyndyqqa janaspaityn aqparat jii taralatynyn aityp, úndeý jasady, -dep habarlaidy Ult.kz.
Osyǵan bailanysty ministr jelilik resýrstardyń ákimshilerin jańalyqtar aǵynyn muqiiat qadaǵalap, rastalmaǵan aqparattyń taralýyna jol bermeýge jáne zańǵa qaishy kontentti joiýǵa shaqyrdy.
"Áleýmettik jeli qoldanýshylarynan da oilanbai áreket etpeýdi, sondai-aq zań talaptaryna sáikes onlain-platformanyń buǵattalýy múmkin jazbalar men pikirler qaldyrmaýdy suraimyn", -deidi ministr feisbýk paraqshasy arqyly.
Aida Balaevanyń sózinshe milliondaǵan azamat jańalyqtardy onlain platformalardan alatynyn eskere otyryp, ministrlik tyiym salý sharalaryna sirek júginedi. Degenmen, jelilik resýrstardyń ákimshileri de óz áreketteriniń saldaryn túsinip, aqparat taratýda eń aldymen oqyrman men qoǵam aldyndaǵy jaýapkershilikti jiti uǵynýǵa tiis.
"Zańǵa qaishy kontent kólemi eki ese ósti"
Statistikaǵa súiensek, 2023 jyldan 2024 jylǵa deiingi aralyqta Qazaqstan internet segmentinde anyqtalǵan zańǵa qaishy kontent kólemi eki ese ósip, 116 354 materialǵa jetti. Eń kóp taralǵan zańbuzýshylyqtar qatarynda – terrorizmdi, dini ekstremizmdi jáne esirtki quraldaryn nasihattaý, onlain-kazino men qarjy piramidalaryn jarnamalaý bar.
Ótken jyly onlain-platformalarda 78 539 zańǵa qaishy material anyqtalyp, onyń 24,3%-y joiyldy.
"Dostar, kez kelgen memlekettiń turaqtylyǵyn qamtamasyz etetin basty faktorlar – aýyzbirshilik pen yntymaq. Sondyqtan bárimiz Memleket basshysy atap ótkendei, naǵyz quqyqtyq memleket qalyptastyrýdyń basty kilti sanalatyn zań men tártip qaǵidatyn berik ustanýymyz qajet", -dep qorytyndylady ministr Balaeva.
