Nur-Sultan qalasynda internetke tegin qosylý múmkindigi qarastyrylǵan «Jýrnalister Alleiasyn» ashý josparlanýda. Bul týraly QR Aqparat jáne qoǵamdyq damý ministri Aida Balaeva Facebook-te jazdy, dep habarlaidy "Ult aqparat".
«Qurmetti aqparat salasynyń qyzmetkerleri!
Barshańyzdy kásibi merelerińizben shyn júrekten quttyqtaimyn!
Aqparat jáne qoǵamdyq damý ministrliginiń bastamasymen elordamyzda «Jýrnalister Alleiasyn» ashý josparlanýda. Tegin internetke qosylý múmkindigin qarastyratyn alleia tilshiler qaýymynyń shyǵarmashylyǵyn shyńdaityn jer ǵana emes, bas qalamyzdyń barsha turǵyndary men qonaqtary úshin de eń súiikti orynǵa ainalady dep senemin.
Alleiaǵa ómirden ótip ketken jýrnalistikadaǵy jarqyn tulǵalardyń esimderi jazylǵan arnaiy aǵashtar ósirip, eske alý taqtalaryn ornatamyz. Sondyqtan alleiany ashý merzimin kóshet otyrǵyzýǵa eń qolaily kezeń kúz maýsymyna aýystyrdyq», - dedi Balaeva.
Ministrdiń aitýynsha, bul bastama taǵy bir biregei jobanyń aiasynda bas qosyp, pikir almasyp, birigip igi is atqarýǵa jol ashatyn tamasha múmkindik bolady.
