Aida Balaeva Dimash Qudaibergendi jastar úshin úlgi dep atady

Foto: QR Mádeniet jáne aqparat ministrligi

Búgin "Daryn" memlekettik jastar syilyǵynyń iegerlerin marapattaý rásimi ótti.

Is-sharaǵa QR Mádeniet jáne aqparat ministri Aida Balaeva, Parlament Májilisiniń depýtattary, qoǵam qairatkerleri, syilyqtyń laýreattary qatysty.

Is-sharaǵa qatysýshylardyń aldynda sóz sóilegen ministr "Daryn" jastar úshin eń mańyzdy marapat ekenin atap ótti.

«Memleket basshysynyń sońǵy jyldary júrgizip jatqan aýqymdy reformalary da osyndai jastarymyzdyń erteńi úshin jasalyp jatyr. Bolashaq Qazaqstannyń álemdik arenada shyn máninde órkenietti, ziialy da zaiyrly, ozyq oily bolýynyń birden-bir kepili de osy. Onyń negizinde qarapaiym, biraq óte maǵynaly bes talap jatyr: bilimdilik, eńbekqorlyq, adaldyq, jaýapkershilik jáne kásipqoilyq. Bul qasietterdiń barlyǵy «Daryn» syilyǵynyń iegerlerine tán qasietter ǵana emes, ósip kele jatqan jastarǵa úlken ónege. Bir ǵana Dimash Qudaibergenniń mysalynda Otanymyzdy, onyń mádenieti men tilin tórtkúl dúniege pash etip júrgen ónerpazdy ǵana emes, ishki parasaty zor, adami tálimi úlgi, jany meiirban azamatty kóremiz. Sóz joq, bul jastarǵa durys baǵyt kórsetetin ónegeli jol», - dep atap ótti Aida Balaeva.

Ministrdiń pikirinshe, jastardyń osyndai jarqyn ókilderi keler urpaqqa úlgi bop, adal eńbek pen ózara syilastyq arqyly salaýatty ómir saltyn nasihattap, qoǵamdyq mádenietti saqtaýǵa, ózin-ózi damytýǵa jáne ortada jaǵymdy kózqaras qalyptastyrýǵa, ulttyq qundylyqtardy saqtaýǵa uiytqy bolýy tiis.

Biyl memlekettik organdar men qoǵamdyq birlestikter 340-tan asa kandidatýra usyndy.

Onyń ishinde "ǵylym" boiynsha -110, "Dizain jáne beineleý óneri" -21, "Sport" -27, "Teatr jáne kino" -49, "Estrada"-12, "Jýrnalistika"-10, "Halyq shyǵarmashylyǵy"-28, "Shyǵarmashylyq bastamalar"-32, "Ádebiet"-28, "Klassikalyq mýzyka"-30 ótinim bar.

Elimizdegi joǵary jetistikke jetken 19 jas «Daryn» memlekettik syilyǵynyń iegeri atandy. Laýreattarǵa diplom, tósbelgi jáne aqshalai syilyq berildi.