Búgin Aqparat jáne qoǵamdyq damý ministri Aida Balaeva úkimettik emes uiym ókilderimen kezdesti. Is-shara jyl saiyn 27 aqpanda atap ótiletin Dúniejúzilik úkimettik emes uiymdar kúni aiasynda ótti, dep habarlaidy "Ult aqparat".
Kezdesýge Parlament Májilisiniń depýtattary Erlan Sairov, Vera Kim, QR Prezidenti janyndaǵy Ulttyq qoǵamdyq senim keńesiniń músheleri Rahym Oshaqbaev, Marat Báshimov, belgili qoǵam qairatkerleri Aigúl Soloveva, Baný Nurǵazieva, Tileýbek Muqashev, Emin Áskerov, Nurgúl Uljekova, Quralai Túspekova jáne Lima Dias qatysty.
Aida Balaeva óziniń quttyqtaý sózinde qazirgi halyqaralyq ÚEU kúni Qazaqstan Táýelsizdiginiń 30 jyldyǵy aiasynda ótip jatqanyn jáne erekshe mánge ie ekenin jetkizdi. Ol óz eliniń azamaty bolý – bul úkimettik emes uiym jetekshileri de jan-jaqty túsinetin jaýapkershilik ekenin atap ótti.
«Osynda otyrǵan árbirińiz otar elden azat el bolýymyzǵa ózderińizdiń úlken azamattyq úlesterińizdi qostyńyzdar. Búgin de aianbai atsalysyp kelesizder», - dedi ministr.
Aida Balaeva táýelsizdiktiń alǵashqy jyldary úkimettik emes uiymdar Semei iadrolyq poligonyn jabý (Nevada-Semei), Kishi Araldy qalpyna keltirý (Araldy qutqarý qory), ana men balany qorǵaý («Bóbek» qory) siiaqty jahandyq mindetterdiń bastaýynda turǵanyn eske saldy.
«Jalpy, qoǵamdyq uiym qurýdyń ózi – adami eriktilikten, azamattyq belsendilikten bastaý alady. Azamattyq uiymdar – jeke bastyń paidasy úshin emes, memleket múddesi, qoǵamnyń igiligi úshin qyzmet etedi.
Memlekettiń barlyq máseleni túgel qamtyp qaraýy múmkin emes. Bul oraida, osy olqylyqtyń ornyn toltyratyn birden bir kúsh ol árine – úkimettik emes uiymdar», - dedi vedomstvo basshysy.
Sonymen qatar, ministr kezdesý halyqaralyq ÚEU kúnin atap ótý úshin ǵana emes, úkimettik emes sektordy damytýdyń mańyzdy máseleleri boiynsha ózekti taqyryptardy talqylaý, tushymdy oi-pikirlerdi ortaǵa salý úshin ótip jatqanyn atap ótti.
Kezdesýge qatysýshylar pikirtalasqa belsendi qatysyp, memleket pen azamattyq qoǵam institýttarynyń ózara yqpaldastyǵynyń mańyzdylyǵyn atap ótti.
Dúniejúzilik ÚEU kúni – bul erkindikke, qoǵamdyq daýysqa, adamdardyń qaýipsizdigine, tabiǵatqa, adamzattyń mádeni murasyna, adamzattyń bolashaǵyna qamqorlyq jasaýǵa baǵyttalǵan jahandyq qundylyqtardy, ÚEU umtylysy men nátijelerin kórsetetin halyqaralyq simvol.
