Aqparat jáne qoǵamdyq damý ministri Aida Balaeva halyqqa esep berý kezdesýinde Azamattyq qoǵamdy damytýdyń 2025 jylǵa deiingi kontseptsiiasy týraly aitty, dep habarlaidy QazAqparat.
«Ministrlik jumysynyń kelesi bir úlken baǵyty – halyq únine qulaq asatyn memleket pen aqparatty qoljetimdi etý. Árine, bul barlyq memlekettik organdarǵa ortaq mindetter. «Halyqtyń únine qulaq asatyn memleket» ideiasy qazir qoǵamnyń qyzý qoldaýyn taýyp, shyn máninde úlken úmit kútetin kontseptsiia bolyp otyr. Onyń aiasynda osy ýaqytqa deiin biraz sharýa atqaryldy. Máselen, ministrlik basshylyǵynyń azamattardy turaqty túrde qabyldaýy men olardyń ótinish-tilekterin baqylaý isi bir júiege keltirilgen. Ministrdiń jeke blogy da úzdiksiz jumys isteidi», - ministr Ortalyq kommýnikatsiialar qyzmetinde onlain rejimde ótken halyqqa esep berý kezdesýi barysynda.
Budan bólek, barlyq memlekettik organdarda qoǵamdyq jáne onlain qabyldaý oryndary ashyldy. Osy oraida, memlekettik organdardyń internet saittaryn biriktirip, azamattardyń ótinishi túsetin Tutas platforma jasaldy. Barlyq óńirlerde «109» bailanys ortalyqtary jumys jasap, ákimdikterde «bir tereze» printsipimen qyzmet kórsetetin front-ofister ashyldy.
«Mine, búgingi bizdiń esep berý kezdesýimiz siiaqty barlyq sharalar qazir tek onlain-transliatsiia arqyly ótedi. Osynyń barlyǵy - «Halyqtyń únine qulaq asatyn memleket» kontseptsiiasynyń qanshalyqty tiimdi ekendigin dáleldedi. Sondyqtan da, bizdiń ministrlik tarapynan osy kontseptsiiaǵa óte mańyzdy strategiialyq qujattyń jobasy engizilip otyr. Ol –Azamattyq qoǵamdy damytýdyń 2025 jylǵa deiingi kontseptsiiasy. Bul, eń aldymen, memlekettik apparattyń qyzmet kórsetý sapasyn arttyrý men azamattyq qoǵamnyń sheshim qabyldaý úrdisterine qatysý belsendiligin arttyrý úshin qajet», - dedi A. Balaeva.
