Aqparat jáne qoǵamdyq damý ministri Aida Balaeva «Aqparatqa qol jetkizý týraly» zańǵa ózgerister men tolyqtyrýlar engiziletinin aitty, dep habarlaidy QazAqparat.
Memleket basshysy Joldaýynyń negizgi erejelerin OKQ alańynda túsindirgen ministr bul zańnyń 2015 jyldan beri jumys istep kele jatqanyn aityp ótti.
Sondai-aq, ministr zań arqyly azamattardyń «Ashyq Úkimet» portaly bazasynda aqparatty erkin alýǵa jáne taratýǵa konstitýtsiialyq quqyǵy iske asyrylyp jatqanyn eske saldy. Portal aiasynda 4 platforma jumys isteidi. Olar: ashyq derekter, Ashyq biýdjetter, Ashyq NQA jáne ashyq dialog. Bul platformalarda 3,5 myńnan astam ashyq memlekettik málimetter jinaqtalyp, 74 myń biýdjettik baǵdarlama jobalary jariialanǵan. Sondai-aq, onda 64 myń normativti-quqyqtyq aktilerdiń jobalary bar. Aida Balaeva bir ǵana «Ashyq dialog» platformasynda birinshi basshylardyń blogtaryna 367 myńnan astam ótinish berilgenin aitty.
«Degenmen qoǵam tarapynan portalǵa júktelgen málimetterge qatysty oryndy syn-pikirler de aitylyp júr. Atap aitqanda, keibir aqparattar – oqýǵa yńǵaisyz, uǵynyqsyz formada usynylady, suraqtarǵa der kezinde jaýap berilmeidi»,- dedi ministr.
Osyǵan bailanysty Prezident Qasym-Jomart Toqaev óz Joldaýynda aqparatqa qol jetkizý máseleleri boiynsha zańnamaǵa ózgerister engizý qajettigin atap ótken bolatyn. Ministrdiń aitýynsha, túzetýler eki negizgi mindetti sheshýdi kózdeidi: baqylaý men jaýapkershilikti kúsheitý. Ol úshin Aqparat jáne qoǵamdyq damý ministrligi málimetterge qol jetkizý salasynda ýákiletti organnyń fýnktsiialary beriletin bolady. Memleket basshysyna osylaisha aqparatqa qol jetkizý salasynyń jai-kúii týraly jyl saiyn esep tapsyrylyp otyrady.
Budan basqa, aqparat ielenýshilerge kásipkerlik sýbektileri men olardyń birlestikterin, memlekettik organdardyń fýnktsiialaryn júzege asyratyn ózin-ózi retteitin jáne úkimettik emes uiymdardy jatqyzý usynylady. Ázirlengen túzetýler qazirgi ýaqytta Parlament Májilisinde qaralatyn aqparat máseleleri jónindegi zań jobasyna engizildi. Jyl sońyna deiin zań jobasy Prezidenttiń qol qoiýyna kirgizilýi tiis.
