Aǵzańyzdan «omikron» shtamyna uqsas simptomdar baiqasańyz ne isteý kerek? Bul suraqqa Nur-Sultan qalasy sanitarlyq-epidemiologiialyq qadaǵalaý basqaramasy basshysynyń orynbasary Janna Pralieva jaýap berdi, dep habarlaidy QazAqparat tilshisi.
«Omikronnyń» ereksheligi bar, óte tez taraidy.
Sondyqtan qala turǵyndaryna aitatynymyz, ózderin nashar sezinse, tamaqtary aýyrsa, úiden shyǵýdyń qajeti joq. Óitkeni aýrý tez arada taraidy. Demde bir-birine juǵyp ketedi. Maskany qaitadan taǵyp júrý kerek. Óitkeni biz qazir kóp adamdardyń dúkenge kirgende maskasyz júrgenin baiqaimyz. «Omikron» shtamy jas talǵamaidy. Eresekter de, jas balalar da aýyra beredi», -dedi maman.
Onyń aitýyna qaraǵanda, «omikron» delta-shtamǵa qaraǵanda 70 ese jyldam taraidy.
«Eń birinshi tamaq aýrýdan bastalady. Dene qyzýy kóteriledi. Taǵy bir ereksheligi – adam tez arada sharshap, jatyp qalady. Eger tańerteń oianǵanda ózińizdi nashar sezinseńiz, úiden shyǵýdyń qajeti joq. Eger siz naýqaspen bailanysta bolǵanyńyzdy uqsańyz, dárigerge barýyńyz kerek. Virýsty taratpaý mańyzdy. Respýblikanyń Bas memlekettik sanitarlyq dárigeriniń qaýlysy boiynsha, bes kúnniń ishinde qalada aýrýshańdyq ósse, shekteýler qabyldanady», - dedi Janna Pralieva.
