اعزاڭىزدان «وميكرون» شتامىنا ۇقساس سيمپتومدار بايقاساڭىز نە ٸستەۋ كەرەك? بۇل سۇراققا نۇر-سۇلتان قالاسى سانيتارلىق-ەپيدەميولوگييالىق قاداعالاۋ باسقاراماسى باسشىسىنىڭ ورىنباسارى جاننا پراليەۆا جاۋاپ بەردٸ, دەپ حابارلايدى قازاقپارات تٸلشٸسٸ.
«وميكروننىڭ» ەرەكشەلٸگٸ بار, ٶتە تەز تارايدى.
سوندىقتان قالا تۇرعىندارىنا ايتاتىنىمىز, ٶزدەرٸن ناشار سەزٸنسە, تاماقتارى اۋىرسا, ٷيدەن شىعۋدىڭ قاجەتٸ جوق. ٶيتكەنٸ اۋرۋ تەز ارادا تارايدى. دەمدە بٸر-بٸرٸنە جۇعىپ كەتەدٸ. ماسكانى قايتادان تاعىپ جٷرۋ كەرەك. ٶيتكەنٸ بٸز قازٸر كٶپ ادامداردىڭ دٷكەنگە كٸرگەندە ماسكاسىز جٷرگەنٸن بايقايمىز. «وميكرون» شتامى جاس تالعامايدى. ەرەسەكتەر دە, جاس بالالار دا اۋىرا بەرەدٸ», -دەدٸ مامان.
ونىڭ ايتۋىنا قاراعاندا, «وميكرون» دەلتا-شتامعا قاراعاندا 70 ەسە جىلدام تارايدى.
«ەڭ بٸرٸنشٸ تاماق اۋرۋدان باستالادى. دەنە قىزۋى كٶتەرٸلەدٸ. تاعى بٸر ەرەكشەلٸگٸ – ادام تەز ارادا شارشاپ, جاتىپ قالادى. ەگەر تاڭەرتەڭ ويانعاندا ٶزٸڭٸزدٸ ناشار سەزٸنسەڭٸز, ٷيدەن شىعۋدىڭ قاجەتٸ جوق. ەگەر سٸز ناۋقاسپەن بايلانىستا بولعانىڭىزدى ۇقساڭىز, دەرٸگەرگە بارۋىڭىز كەرەك. ۆيرۋستى تاراتپاۋ ماڭىزدى. رەسپۋبليكانىڭ باس مەملەكەتتٸك سانيتارلىق دەرٸگەرٸنٸڭ قاۋلىسى بويىنشا, بەس كٷننٸڭ ٸشٸندە قالادا اۋرۋشاڭدىق ٶسسە, شەكتەۋلەر قابىلدانادى», - دەدٸ جاننا پراليەۆا.
