«Astana meditsina ýniversiteti» KeAQ juqpaly aýrýlar jáne klinikalyq epidemiologiia kafedrasynyń dotsenti, qalalyq juqpaly aýrýlar ortalyǵy bólim meńgerýshisi Záýresh Smaǵulova «Koronavirýsqa qarsy antideneleri bar turǵyndarǵa vaktsina alý qajet pe?» degen suraqqa jaýap berdi, dep habarlaidy QazAqparat.
«Kez kelgen juqpaly aýrýdyń ereksheligi – immýnitet túzilip, antidenelerdiń belgili bir mólsherde damýy. Sondyqtan kez kelgen infektsiiadan keiin árdaiym immýnitet iske qosylady jáne antideneler shyǵady. Al olardyń denemizde qansha ýaqyt saqtalatyny aǵzanyń ózine bailanysty. Eger antideneler titri aitarlyqtai joǵary bolsa jáne uzaq ýaqyt saqtalsa, vaktsina salýdyń qajeti joq. Al eger antidene titri ýaqyt óte kele tómendese nemese tórtinshi, altynshy aida nólge deiin tússe, onda immýndaý máselesi týyndaýy múmkin», - dep túsindirdi dáriger Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, koronavirýspen aýyrǵandarǵa vaktsina salmaýdyń basty sebebi – antidenelerdiń bolýy.
«Vaktsinatsiianyń máni de sol – ony aǵzaǵa engizgende, aǵza oǵan immýnitet, iaǵni antideneler shyǵarý arqyly jaýap beredi. Sondyqtan aǵzada antideneler bar bolsa, qaita vaktsina egýdiń qajeti joq», - dedi Z. Smaǵulova.
QR DSM Ulttyq Qoǵamdyq densaýlyq saqtaý ortalyǵy Sanitarlyq-epidemiologiialyq saraptama jáne monitoring ǵylymi-praktikalyq ortalyǵy direktorynyń orynbasary Manar Smaǵuldyń aitýynsha, Dúniejúzilik densaýlyq saqtaý uiymynyń keńesine sáikes, koronavirýs infektsiiasymen aýyrǵan adamdarǵa alty ai boiy vaktsinatsiiadan bas tartý usynylady.
«Kelesi ailarda jańa derekter paida bolsa, usynymdar da jańartylady. Koronavirýspen aýyrǵandarǵa alty aidan keiin vaktsina alýǵa bolady», - deidi M. Smaǵul.
