Qazaqstan Prezidentiniń tóraǵalyǵymen Jańǵyrtý jónindegi ulttyq komissiia jumysynyń máselelerine arnalǵan keńes ótti, dep habarlaidy "Ult aqparat" Aqordaǵa silteme jasap.
Keńeske Premer-Ministr B.Saǵyntaev, Májilis tóraǵasy N.Nyǵmatýlin, Prezident Ákimshiliginiń Basshysy Á.Jaqsybekov, Úkimet músheleri, ortalyq memlekettik organdar men ulttyq kompaniialar jetekshileri qatysty.
Keńes barysynda Memlekettik qyzmet isteri jáne sybailas jemqorlyqqa qarsy is-qimyl agenttiginiń tóraǵasy Q.Qojamjarov, Prezident Ákimshiligi Basshysynyń orynbasary T.Donaqov, Ulttyq ekonomika ministri T.Súleimenov, Prezident Ákimshiligi Basshysynyń birinshi orynbasary M.Tájin, Senat tóraǵasynyń orynbasary B.Beknazarov baiandama jasady.
Memleket basshysy jumys toby jetekshileriniń esepterin tyńdap, Bes institýtsionaldyq reformanyń jekelegen baǵyttarynyń iske asyrylý barysyna toqtaldy.
– Birinshi reformaǵa toqtalaiyq. «B» korpýsynyń basshylyqtaǵy qyzmetkerlerin attestatsiialaý qorytyndysynda kóptegen ministrlik pen ákimdikterde jumys isteitinderdiń strategiialyq jáne baǵdarlamalyq qujattardy bilý deńgeii tómen ekeni anyqtaldy. Eń aldymen, bul aýyl sharýashylyǵy, densaýlyq saqtaý, bilim jáne ǵylym ministrlikterine, sondai-aq barlyq ákimdikterge qatysty bolyp otyr. Memlekettik qyzmetkerlerdiń qyzmet babynda ósý jaǵdaiy jaqsardy. Sonymen birge, birqatar memlekettik organdarda «komandalyq aýys-túiiske» bailanysty basshylyq quramnyń aýysý deńgeii joǵary ekeni baiqalady, – dedi Elbasy.
Nursultan Nazarbaev «óz erkimen» bosaǵan laýazymdarǵa túrli kezeńde basshylarmen birge jumys istegen adamdar taǵaiyndalyp jatqanyn aitty, sondai-aq bul máselelerdi retke keltirý jóninde qosymsha sharalar qabyldaýdy tapsyrdy.
– Zańdylyq pen quqyqtyq tártiptiń buzylýy týraly halyqtyń Prezident Ákimshiligine aryz-shaǵymy azaimai tur. Sotqa deiingi satyda naqty jaryspalylyq joq. Qorǵaýshylar men quqyq qorǵaý organdary qyzmetkerleriniń biliktiligi jetkiliksiz. Aiqyn ári bolmashy buzýshylyqtar jónindegi rásimderdi meilinshe jeńildetý qajet. Adamdar qarapaiym ister boiynsha sheshimdi ailap kútpeýi kerek. Sot jáne quqyq qorǵaý organdarynyń sheshimderi jinaqy ári adamdarǵa túsinikti bolýǵa tiis, – dedi Qazaqstan Prezidenti.
Sondai-aq, Memleket basshysy jergilikti politsiia qyzmetine toqtalyp, shuǵyl jaǵdailarda olardy basqarýdyń jáne áreket etý jedeldiginiń tómendemeýine jol bermeý qajettigine toqtaldy.
– Jergilikti politsiia ishki ister organdarynyń birtutas júiesinde bolǵan jáne solai bolyp qala beredi. Alaida, ákim politsiia aldyna jergilikti mańyzy bar quqyqtyq tártipti qamtamasyz etý jáne quqyq buzýshylyqtyń aldyn alý jóninde mindetter qoiýǵa quqyly, – dedi Elbasy.
Nursultan Nazarbaev Bes institýtsionaldyq reformanyń úshinshi baǵytyna qatysty 50 qadamnyń 13-i iske asyrylǵanyn, al qalǵany boiynsha jumystardyń júrgizilip jatqanyn atap ótti.
Sonymen birge, Qazaqstan Prezidenti jańa Salyq kodeksi jobasynan tiimsiz jeńildikter men artyqshylyqtardy alyp tastaý qajettigin taǵy da eskertip, bul másele jóninde aýqymdy túsindirý jumystaryn júrgizýdi tapsyrdy.
Budan bólek, Memleket basshysy óńirlik elektr júieleri kompaniialaryn irilendirý jónindegi zańdy oryndaýdyń mańyzdy ekenine nazar aýdardy. Onyń nátijesinde tutynýshylar úshin elektr energiiasynyń baǵasy tómendeýge tiis.
– Eksporttyq taýarlar jasaý jáne álemdik naryqqa shyǵý úshin qaita óńdeý sektoryna keminde 10 transulttyq kompaniiany tartý mindeti qoiylǵan bolatyn. Byltyr «Tenaris», «EFKO» jáne «Koka-kola» kompaniialary iske asyrǵan 3 birlesken joba ǵana iske qosyldy. Bul rette, koka-kola shyǵaratyn kompaniia elimizde ótken ǵasyrdan bastap jumys isteýde, – dedi Elbasy.
Nursultan Nazarbaev «iri investorlardyń» qatysýymen ekonomikanyń basym sektorlaryndaǵy jobalardy iske asyrý turǵysynan sońǵy 2 jylda aitarlyqtai ilgerileýshilik bolmaǵanyn aitty.
– Bul jóninde jyl saiyn aityp kelemiz. Áli kúnge deiin strategiialyq investormen birge osy salada birde-bir joba iske asyrylǵan joq. Arnaiy «Kazakh Invest» ulttyq kompaniiasyn qurdyq. Oǵan airyqsha mártebe berip, barlyq óńirde ókildikterin ashtyq. Jarty jyl ótti, nátijesi qaida? – dedi Qazaqstan Prezidenti. Sondai-aq, Premer-Ministrge investorlar tartý jónindegi jumystarǵa jaýapkershilik belgileý júkteldi.
Sonymen qatar, Qazaqstan Prezidenti «Astana» halyqaralyq qarjy ortalyǵy men onyń institýttarynyń budan arǵy jumys jospary men perspektivalaryna toqtaldy.
Memleket basshysy Úkimet qabyldaǵan sharalarǵa qaramastan, jer qoinaýyn paidalaný sektorynda oryn alyp otyrǵan sybailas jemqorlyq máselelerine toqtalyp, bul saladaǵy zańnamany qaita qarastyrýdy tapsyrdy.
Sońynda Nursultan Nazarbaev Ult josparyn odan ári iske asyrý úshin biliktiń barlyq tarmaǵynyń aldynda turǵan aýqymdy jumys kólemin aiqyndap berdi.
– Konstitýtsiialyq reforma aiasynda Úkimettiń Parlament pen onyń palatalary aldyndaǵy eseptiligi men baqylanýy kúsheitildi. Kez kelgen basshy jaýapkershilikti basqaǵa aýdarmai, máseleni óz deńgeiinde jedel ári biliktilikpen sheshýge tiis. Aǵymdaǵy máselelerdi Prezidenttiń deńgeiine shyǵarýdyń qajeti joq, – dedi Elbasy.
.jpeg)