23 qarashada Angliianyń Joǵary soty Qazaqstan Respýblikasyna qarsy «World Wide Minerals» kanadalyq kompaniianyń jáne Pol A. Kerolldyń talaby boiynsha osydan buryn shyǵarylǵan tórelik sheshimniń (sonyń ishinde zalal, paiyzdar jáne somalar boiynsha mánine qatysty) kúshin joidy, dep habarlaidy "Ult aqparat" QR Ádilet ministrliginiń saityna silteme jasap.
Buryn habarlanǵandai, 2019 jyldyń 29 qazanynda Tórelik tribýnal talap-aryzdyń jalpy somasynan (1,9 mlrd AQSh dollary) 1%-dan kem mólsherinde talapkerlerge ótemaqy uiǵarýmen sheshim shyǵardy.
Qazaqstan Respýblikasy sheshimge shaǵymdaný úshin 2019 jyldyń qarasha aiynda 1996 jylǵy Tórelik Zańnyń 68-babynyń tártibimen tóreliktiń qaralatyn orny boiynsha Angliianyń Joǵary sotyna ótinish berdi.
Nátijisinde, Angliianyń Joǵary soty 2020 jylǵy 23 qarashada qazaqstandyq taraptyń dálelderimen kelise otyryp, talapkerlerge uiǵarylǵan talap somasy men shyǵyndarǵa qatysty sheshimniń kúshin joiyp, ony tórelik tribýnalǵa qaita qaraýǵa jiberdi.
Sondai-aq, sot «World Wide Minerals Ltd» jáne P. Karroldan QR-nyń paidasyna 350 000 AQSh dollary kóleminde sot shyǵyndaryn óndirip alý týraly sheshim shyǵardy. Angliianyń Joǵary soty 1996 jylǵy tórelik Zańnyń 68-babynyń tártibinde shaǵymdaný protsesine bailanysty Qazaqstan Respýblikasyna beriletin ózge de shyǵyndardyń somasyn qosymsha baǵalaidy.
Bul Qazaqstan Respýblikasy óziniń bedelin nyǵaitý úshin quqyqtyq tetikter qoldaný sheńberinde óziniń múddelerin qorǵaý jónindegi jumystardy jalǵastyratynyn rastaidy. Osynyń bári ádil sheshimderge qol jetkizý jolyndaǵy túbegeili qaisarlyqty kórsetedi.
Osy daýda Qazaqstan Respýblikasynyń múddelerin Ádilet ministrligi, «Reed Smith LLP» halyqaralyq zań firmasy, «Essex Court Chambers» advokattyq palatadan Djo Smoýa koroldik advokaty, London q. «3 Verulam Buildings» advokattyq palatynyń músheleri Kristofer Hariskoroldik advokaty jáne Pol Vi advokatymen birlese bildiredi.
«Essex Court Chambers» jáne «3 Verulam Buildings» ókilderi birqatar kópmilliardtyq tórelik talaptar boiynsha Qazaqstan Respýblikasynyń múddelerin sátti qorǵaǵanyn atap ótý qajet.
Sondai-aq, «3 Verulam Buildings»-nyń ókili koroldik advokat Áli Malek 2017 jyly «Stati» isi boiynsha Angliianyń Joǵary sotynda Qazaqstan Respýblikasynyń múddelerin bildirgen. Onyń nátijesinde, Statidiń paidasyna tórelik sheshim alaiaqtyq jolymen alynǵandyǵy týraly jetkilikti senimdi dálelderdiń (prima facie) bolýy týraly sheshim shyǵaryldy.
Áli Malek «Jyldyń banktik advokaty» dep tanyldy.
