Mektepte oqýshylarǵa aǵylshyn tilinde pánder tek 10 jáne 11 synypta, balanyń tildik qabileti jetkilikti bolǵan jáne mektep daiyn bolǵan jaǵdaida, mekteptiń sheshimimen ǵana beriletin bolady. Bul týraly Úkimettiń baspasóz ortalyǵynda Bilim jáne ǵylym ministri Kúlásh Shámshidinova málim etti, dep habarlaidy "Ult aqparat".
«Úshtildilikke bailanysty: eń birinshi másele - qazaq tilin oqytý máselesi. Ekinshi orys tili, aǵylshyn tili máseleleri. Iaǵni tilderdi oqytý bul deńgeige bailanysty tórt daǵdyny damytýǵa baǵyttalady. Olar - tyńdaý, aitý, sóileý jáne jazý daǵdylary. Sondyqtan aǵylshyn tilinde balalarǵa pándi berý tek 10 jáne 11 synypta, balanyń tildik qabileti jetkilikti bolǵan jaǵdaida jáne mektep daiyn bolǵan jaǵdaida, mekteptiń sheshimimen ǵana júretin bolady. Qazirgi tańda 153 mektepte uiymdastyrylǵan aǵylshyn tilinde oqytýǵa biz monitoring ótkizip otyrmyz. Osy monitoringtiń nátijesinde damytýǵa bolatyn suraqtar jáne osy nárseni damytýǵa kedergi keltiretin máseleler anyqtalyp, bolashaqta mektepterge kómek retinde beriletin bolady», - deidi ministr.
Eske sala ketsek, Kúlásh Shámshidinova mektepte tórt pándi aǵylshyn tilinde oqytý máselesin buǵan deiin de túsindirgen bolatyn.
«Búginde barlyq adamdardy oilandyryp júrgen mańyzdy bir másele ol - ximiia, fizika, informatika men biologiia pánderin joǵary synypty aǵylshyn tilinde oqytý. Osyǵan bailanysty qazir aǵylshynsha sabaq berýge asyqpai kóshý týraly sheshim qabyldanyp otyr. Respýblika boiynsha 150-den artyq mektep ol baǵdarlamaǵa kóshken. Biz qazir bulardy zerdelep, qarap otyrmyz. Oqýshylar neden qinalyp otyr? Ustazdar qandai qiyndyq kórip jatyr? Biz olarǵa qalai kómektesemiz? Sony jan-jaqty zerdelep jatyrmyz. Sondyqtan ustaz ben mektep daiyn bolǵan kezde, ózderińizben kelise otyryp, birtindep aǵylshyn tilinde oqytýdy engize bastaimyz. Asyqpaimyz, eshkim qýyp kele jatqan joq», - degen edi K.Shámshidinova Astanadaǵy kópbalaly analarmen bolǵan kezdesýde.
