Májilis tóraǵasy Erlan Qoshanov búgin tómengi palata qabyldaǵan áielderdiń quqyqtary men balalardyń qaýipsizdigin qamtamasyz etetin Zańdarǵa qatysty pikir bildirdi, dep habarlaidy "Ult aqparat".
«Búgin biz óte mańyzdy Zań qabyldadyq. Bul qujat Memleket basshysynyń tapsyrmasymen ázirlenip, zań ústemdigi men tártipti qamtamasyz etýge tikelei baǵyttalǵan. Otbasy men turmystaǵy zorlyq-zombylyq — qoǵamda jii talqylanatyn ózekti ári óte ótkir másele. Atalǵan problemany quqyq qorǵaýshylar men depýtattar ǵana aityp júrgen joq. Áielder men balalardyń qorǵansyzdyǵy jaiyndaǵy másele BAQ-ta, áleýmettik jelide óte jii kóterilýde. Agressorlar men abiýzerlerdiń kesirinen qanshama shańyraq shaiqalyp, áiel taǵdyry talqyǵa túsip, balalar zardap shegýde», — dedi Májilis spikeri.
Onyń atap ótýinshe, áielder men balalarǵa qatysty zorlyq-zombylyq úshin jaýapkershilikti qataitýdy jurtshylyq kópten beri talap etip keledi.
«Endi Zań boiynsha mundai qylmystar úshin qatań sharalar qoldanylady. Ol óte oryndy. Jalpy, áielder men balalarǵa kúsh kórsetýge, agressiia men zorlyq-zombylyqqa jol bergizbeýge tiispiz. Ata dástúrlerimizdi berik ustanyp, erli-zaiyptylar arasynda shynaiy qurmet, syilastyq pen balalarǵa degen qamqorlyq ornyǵýy qajet. Óte aýqymdy jumys atqaryldy», — dedi Erlan Qoshanov.
