Qazaqstannyń Qarjy monitoringi agenttigi "Karuan" kompaniiasyn reiderlik jolmen tartyp alǵany" týraly shaǵym túskenin rastady. Buǵan deiin keibir jergilikti BAQ biznesmen Nursha Kákenov "eks-prezident Nursultan Nazarbaevtyń inisi Bolat Nazarbaev biznesimdi tartyp aldy" dep shaǵymdanǵanyn habarlaǵan.
"BAQ ókilderinen túsken suraýlarǵa QMA 2022 jyldyń 17 maýsymynda Almaty qalasy prokýratýrasynan Almaty qalasy boiynsha Ekonomikalyq tergeý departamentine Nursha Kákenovten Karuan JShS-niń reiderlik jolmen alynǵany týraly habarlama túskenin habarlaidy. Ótinishte kórsetilgen dálelder tekserýge jatady, onyń nátijelerine quqyqtyq baǵa beriledi", - delingen habarlamada.
QMA málimetinshe, basqa aqparat jariia etýge jatpaidy.
Buǵan deiin Kozachkov offside Telegram-arnasynda Nursha Kákenov "Karuan" JShS quryltaishylarynyń biri bolǵanymen, onyń úlesin tartyp alǵany týraly aqparat paida bolǵan. Aryzdanýshy óz shyǵynyn 150 million dollarǵa baǵalǵan.
Jýrnalistiń aitýynsha, "Karuan" Mańǵystaý oblysynda marganets óndirýmen ainalysqan. 2006 jyly onyń jalǵyz quryltaishysy retinde bolyp Bolat Nazarbaev qaldy. Al ótken jyly kásiporyn jumysyn toqtatty.
Aita keteiik, Bolat Nazarbaev – eks-prezident Nursultan Nazarbaevtyń inisi. Qańtar oqiǵasynan keiin Nursultan Nazarbaev qaýipsizdik keńesi tóraǵasy qyzmetinen aiyrylyp, keibir týystary men serikteri joǵary qyzmetterinen alynǵan. Kei aqparattarǵa qaraǵanda, Bolat Nazarbaev 6 qańtarda qazaq-qyrǵyz shekarasynan ótip, Bishkek arqyly Dýbaiǵa ushyp ketken.
Biyl sáýir aiynda Almaty oblysyndaǵy Almaty Steklo zaýytyn ieleriniń biri reiderlik zorlyq kórgenin, kásiporyndaǵy úlesiniń jartysyn Bolat Nazarbaev tartyp alǵanyn málimdegen. Odan buryn qarjylyq monitoring agenttigi Bolat Nazarbaevqa qatysy bar maining kompaniialardy anyqtaǵan.
