Almatydaǵy Jambyl atyndaǵy jasóspirimder kitaphanasynda jazýshy Maqsat Máliktiń «Aǵash adam» atty kitabynyń tanystyrylymy ótti, dep habarlaidy Baq.kz agenttigi.
Jańa kitapqa jazýshynyń buǵan deiin esh jerde jariialanbaǵan «Qudyq basyndaǵy ekeý», «Eski úige aparatyn jol», «Zulymdyq portreti», «Barsik» jáne basqa da qyzyqty áńgimeleri engen.
Maqsat Málik - jańa ǵasyr basynda bizben birge ádebiettiń kieli tabaldyryǵynan senimdi attaǵan daryndy jazýshy. Az jazsa da saz jazatyn, mistika men psihologizmderdi qatar óre alatyn, árip arqyly emes, sóilemder arasynda jasyrýly alýan túrli oilar men tuspaldardy túisigińe jetkize biletin, zamanaýi prozanyń qyr-syryn jetik meńgergen talǵampaz qalamger. Maqsattyń shyǵarmashylyǵy kóp oqyrmanǵa tanys bolmaǵan shyǵar, biraq taptaýryn emes, ózge prozany izdeýshi, erekshe stildi jaqsy kóretin adamǵa taptyrmaityn qazyna, - deidi Qazaqstan Jazýshylar odaǵy tóraǵasynyń birinshi orynbasary, aqyn Aqberen Elgezek.
«Aǵash adam» kitaby Almaty qalasy ákimdiginiń qoldaýymen 2021 jyldyń jeltoqsanynda basylyp shyqqan.
Bul kitap mistikialyq, fentezi janry negizinde jazyldy. Áńgimeler jinaǵynan týratyn kitap jalpy oqyrmanǵa arnalǵan. Ákimdiktiń qoldaýymen shyqqan kitap qaladaǵy barlyq kitaphanalarǵa taratylady, - deidi jazýshy M. Málik.
Jańa týyndy «Abai» baspasynan 1000 danamen basylyp shyqqan.
Aita ketsek, jazýshy Maqsat Máliktiń buǵan deiin «Jumbaq kitap» atty shyǵarmalar jinaǵy jaryq kórgen bolatyn.
