Videodan skrinshot
Shymkentte Afrika qurlyǵynda dúniege kelgen jas jigit áskeri boryshyn ótep júr. Karl Ýedraogo búginde Ulttyq ulan sapynda el tynyshtyǵyn kúzetip júrgen sarbazdardyń biri, dep habarlaidy Almaty.tv.
Ol Afrikadaǵy Býrkina-Faso memleketinde týǵanymen, balalyq shaǵy Almatyda ótken. Anasy qazaq ultynan bolǵandyqtan, ózin Qazaqstannyń perzenti sanaidy.
– Meniń anam – qazaq. Balalyq shaǵym Almatyda ótti. Sondyqtan Qazaqstan – meniń Otanym. Osy elge qyzmet etý – men úshin úlken mártebe, – deidi qatardaǵy jaýynger Karl Ýedraogo.
25 jastaǵy sarbaz áskeri qyzmetti sanaly túrde tańdaǵanyn aitady. Onyń sózinshe, Otan aldyndaǵy boryshty óteý – ár azamattyń paryzy.
Qazir ol Qazaqstan Respýblikasynyń Ulttyq ulany quramyndaǵy 6506 áskeri bóliminde júrgizýshi bolyp qyzmet atqarady. Áskeri bólim basshylyǵy Karldyń tártipke beriktigi men jaýapkershiligin erekshe atap ótti.
– Basqa elde týylsa da, Qazaqstannyń jol erejelerin óte jaqsy meńgergen, – dedi áskeri bólim komandiriniń orynbasary Idris Chaýshev.
Búginde atalǵan áskeri bólimde 500-ge jýyq sarbaz qyzmet etedi. Olar el qaýipsizdigin qamtamasyz etip, qoǵamdyq tártipti kúzetýge atsalysyp júr.
