AES salǵansha kún men jel energetikasyn nege damytpasqa? Ortalyq kommýnikatsiialar qyzmetinde ótken brifingide QR Energetika ministri Bolat Aqsholaqovqa osyndai suraq qoiyldy, dep habarlaidy QazAqparat.
«Birinshi másele baǵaǵa bailanysty. Jańartylatyn energiia kózderiniń qazirgi tarifi, árine, bizdiń qoldanystaǵy dástúrli stansalardaǵydan qymbat. Ekinshiden, ókinishke qarai, jańartylatyn energiia kózderi manevrge ikemsiz, stansalardyń tiregine ainala alady deýge de kelmeidi. Iaǵni, úzilissiz qýat bere almaidy. Óitkeni tabiǵattyń jaratylysy solai – ne únemi jel soǵyp turýy kerek, ne únemi kún shyǵyp turýy shart», - dedi ministr.
Onyń aitýynsha jel men kúnnen alatyn qýatty da generatsiialaýǵa bolady.
«Ol biraq taza generatsiia emes, akkýmýliatsiia ǵana. Jel nemese kún kózi mol bolǵan kezde artyǵymen qýat jinaqtap, qaýyrt saǵattarda tapshylyqtyń ornyn jabýǵa bolady. Biraq bul tehnologiia áli jetkilikti damyp úlgergen joq. Onyń ústine qymbat», - dedi Bolat Aqsholaqov.
Vedomstvo basshysy Qazaqstannyń jaǵdaiynda atom elektriniń ornyn gaz da basa almaidy degen paiym aitty.
«Qazaqstannyń bul salada kómirtegi beitaraptyǵy týraly saiasat ustanyp otyrǵanyn bilesizder. Kómir jaǵatyn úlken stansalardy jobalai almaimyz. Mundai talappen tek gazdy jaǵýǵa bolady. Qazaqstannyń energetikalyq teńgerimine 17 GVt energiia kerek desek, onyń bárin gazben jabý úshin orasan mol gaz kerek. Qýaty 1 GVt bolatyn stansa jumys isteýi úshin shamamen 2 mlrd tekshe metr gaz qajet. 17 GVt qýatty gazdan alatyn bolsaq, bizde ondai mólsherdegi shikizat ta joq. Onyń ústine biz gazdy óńirlerdi gazdandyrýǵa jumsap jatyrmyz. Gaz munaimen biriktirip, basqa da ónimder alýǵa taptyrmaityn shikizat. Osynyń bárin eskersek, bizde atom energetikasyn damytýdyń úlken áleýeti bar», - dedi Energetika ministri.
