QR Energetika ministrligi atom energetikasy jáne ónerkásibi departamentiniń direktory Jaslan Qasenov AES salý boiynsha qandai kompaniialardyń usynystary zerttelip jatqanyn aitty, dep habarlaidy QazAqparat.
«Qazirgi tańda Qazaqstannyń tabiǵi-klimattyq faktorlary men AES-tiń qorshaǵan ortaǵa yqtimal áserin negizge ala otyryp atom energetikasyn damytý jónindegi zertteýler júrgizilip jatyr. Usynyp otyrǵan 6 jetkizýshiniń jobalaryn zerttep jatyrmyz.
Bul amerikalyq (NuScale), amerikalyq-japoniialyq (GE-Hitachi), koreialyq (KHNP), qytailyq (CNNC), reseilik (Rosatom) jáne frantsiialyq(EDF) tehnologiialar», - dedi Jaslan Qasenov Ortalyq kommýnikatsiialar qyzmetinde ótken brifingide.
Onyń málimeti boiynsha, bul baǵyttaǵy zertteý jumystary reaktorlardyń qaýipsizdigin de qamtymaq. Sondai-aq, AES salynatyn oryn, reaktordyń qýaty jáne quny boiynsha zerdeleý júrgizilip jatyr.
«Bizdiń elimizde atom energetikasyn damytýǵa barlyq múmkindikterimiz bar. Biz óndiriletin tabiǵi ýran kólemi boiynsha álemde birinshi oryn alamyz. Bizde iadrolyq otyn komponentteriniń óndirisi bar. Sondai-aq, bizdiń elde ýrandy izotoptyq baiytý tehnologiiasy bar deýge bolady. Byltyr Úlbi metallýrgiia zaýytynyń bazasynda Qytaidyń atom elektr stantsiialaryna daiyn iadrolyq otyn shyǵaratyn zaýyt ashyldy. Qazir onda iadrolyq otyn belsendi óndirilip jatyr», - dedi ministrlik ókili.
