Reseilik oppozitsiialyq saiasatker Aleksei Navalnyidyń advokattary Olga Mihailova men Vadim Kobzev qorǵaýyndaǵy azamattyń densaýlyǵynyń kúrt nasharlaǵanyn habarlady. Navalnyi qazir Vladimir oblysy Pokrov qalasyndaǵy túrmede otyr.
Mihailov pen Kobzevtiń sózine qaraǵanda, ótken aptanyń sońynan bastap oppozitsionerdiń beli qatty aýyra bastaǵan. Buǵan qosa, saiasatker aiaq syrqyraýyna da shaǵymdanǵan. Advokattardyń aitýynsha, oǵan aýrýdy basatyn "Ibýprofen" preparatynyń nebári eki tabletkasy ǵana berilgen.
Sársenbi kúni Navalnyiǵa advokattaryn kirgizbegen. Kezdesý saǵat 13-ke belgilengen, alaida keshke qarai Mihailov pen Kobzev túrme aýmaǵynan shyǵarylǵan.
Túrme ákimshiligi bul oqiǵany "rejimdik sharalarmen" túsindirgen. Navalnyi komandasy oppozitsioner tutqyndalǵaly beri advokattarynyń belgilengen merzimde alǵash ret kire almaǵanyn aityp otyr. Saiasatkerdiń jaqtastary Navalnyidy aýrýhanaǵa jatqyzǵan bolýy múmkin, biraq túrme ákimshiligi ony jasyryp otyr dep topshylaidy.
Byltyr jazda Navalnyi Sibirge sapary kezinde ýlanǵan. Saiasatkerdiń ózi men jaqtastary qastandyqty Resei biligi uiymdastyrdy dep sanaidy. Kreml muny joqqa shyǵarady.
2 aqpanda Máskeýdiń Simonov soty Aleksei Navalnyidy 2013 jyly qozǵalǵan qylmystyq is boiynsha túrmege jibergen. Ony Máskeýden 110 shaqyrym jerdegi Pokrov qalasyndaǵy № 2 koloniiaǵa etappen jetkizgen.
- Qysta Reseidiń ondaǵan qalasynda Navalnyidy qoldaý aktsiialary ótti. Oǵan ondaǵan myń adam qatysty. Narazylyqtan keiin Resei tergeý komiteti 40-tan astam qylmystyq is qozǵady. Sol ister negizinde Navalnyidyń janynda júrgen belsendiler de ustaldy.
