رەسەيلٸك وپپوزيتسييالىق ساياساتكەر الەكسەي ناۆالنىيدىڭ ادۆوكاتتارى ولگا ميحايلوۆا مەن ۆاديم كوبزەۆ قورعاۋىنداعى ازاماتتىڭ دەنساۋلىعىنىڭ كٷرت ناشارلاعانىن حابارلادى. ناۆالنىي قازٸر ۆلاديمير وبلىسى پوكروۆ قالاسىنداعى تٷرمەدە وتىر.
ميحايلوۆ پەن كوبزەۆتٸڭ سٶزٸنە قاراعاندا, ٶتكەن اپتانىڭ سوڭىنان باستاپ وپپوزيتسيونەردٸڭ بەلٸ قاتتى اۋىرا باستاعان. بۇعان قوسا, ساياساتكەر اياق سىرقىراۋىنا دا شاعىمدانعان. ادۆوكاتتاردىڭ ايتۋىنشا, وعان اۋرۋدى باساتىن "يبۋپروفەن" پرەپاراتىنىڭ نەبەرٸ ەكٸ تابلەتكاسى عانا بەرٸلگەن.
سەرسەنبٸ كٷنٸ ناۆالنىيعا ادۆوكاتتارىن كٸرگٸزبەگەن. كەزدەسۋ ساعات 13-كە بەلگٸلەنگەن, الايدا كەشكە قاراي ميحايلوۆ پەن كوبزەۆ تٷرمە اۋماعىنان شىعارىلعان.
تٷرمە ەكٸمشٸلٸگٸ بۇل وقيعانى "رەجيمدٸك شارالارمەن" تٷسٸندٸرگەن. ناۆالنىي كومانداسى وپپوزيتسيونەر تۇتقىندالعالى بەرٸ ادۆوكاتتارىنىڭ بەلگٸلەنگەن مەرزٸمدە العاش رەت كٸرە الماعانىن ايتىپ وتىر. ساياساتكەردٸڭ جاقتاستارى ناۆالنىيدى اۋرۋحاناعا جاتقىزعان بولۋى مٷمكٸن, بٸراق تٷرمە ەكٸمشٸلٸگٸ ونى جاسىرىپ وتىر دەپ توپشىلايدى.
بىلتىر جازدا ناۆالنىي سٸبٸرگە ساپارى كەزٸندە ۋلانعان. ساياساتكەردٸڭ ٶزٸ مەن جاقتاستارى قاستاندىقتى رەسەي بيلٸگٸ ۇيىمداستىردى دەپ سانايدى. كرەمل مۇنى جوققا شىعارادى.
2 اقپاندا مەسكەۋدٸڭ سيمونوۆ سوتى الەكسەي ناۆالنىيدى 2013 جىلى قوزعالعان قىلمىستىق ٸس بويىنشا تٷرمەگە جٸبەرگەن. ونى مەسكەۋدەن 110 شاقىرىم جەردەگٸ پوكروۆ قالاسىنداعى № 2 كولونيياعا ەتاپپەن جەتكٸزگەن.
- قىستا رەسەيدٸڭ ونداعان قالاسىندا ناۆالنىيدى قولداۋ اكتسييالارى ٶتتٸ. وعان ونداعان مىڭ ادام قاتىستى. نارازىلىقتان كەيٸن رەسەي تەرگەۋ كوميتەتٸ 40-تان استام قىلمىستىق ٸس قوزعادى. سول ٸستەر نەگٸزٸندە ناۆالنىيدىڭ جانىندا جٷرگەن بەلسەندٸلەر دە ۇستالدى.
