Advokat Lázzat Raqysheva áleýmettik jelidegi paraqshasynda túngi ýaqytta kómek surap kelgen úsh balanyń anasyna qatysty jaǵdaidy baiandady, dep habarlaidy ult.kz.
Onyń aitýynsha, demalys kúni túngi saǵat 23:30 shamasynda ortalyqqa 7 ailyq sábii bar áiel jylap kelgen. Úsh balanyń anasy kúieýiniń ózine opasyzdyq jasap júrgenin kezdeisoq bilgen.
Áiel kúieýiniń basqa áielmen kezdesip júrgenin olardyń shaǵyn kásibindegi beinebaqylaý kamerasynan kórgen. Keiin kamera jazbasynan er adamnyń álgi áielmen jynystyq qatynasqa túskenin baiqaǵan.
Osydan keiin áiel aldymen kúieýimen sóilesken. Alaida advokattyń sózinshe, er adam óz áreketine jaýapkershilik alýdyń ornyna úiden ketip qalǵan.
Keiin áiel kúieýiniń kóńildesimen sóilesýge barǵan. Alaida eki áieldiń arasyndaǵy áńgime janjalǵa ulasyp, qarsy tarap oǵan qol kóterip, uryp-soǵyp, itergen. Raqyshevanyń jazýynsha, sol kezde áieldiń janynda bolǵan balasyna da kúsh kórsetilgen.
Qazir úsh balanyń anasy politsiiaǵa aryz jazyp, ajyrasýǵa ótinish bergen.
Advokat osy jaǵdaiǵa bailanysty otbasyly er azamattarǵa úndeý jasady.
«Er azamat úsh balanyń ákesi bola tura, jaryna opasyzdyq jasap, basqa áielderge barǵany durys emes. Eger otbasy qurýǵa, bir adamǵa adal bolýǵa daiyn bolmasańyz, úilenýdiń ne qajeti bar? Úsh balany dúniege ákelgen áieldi jalǵyz qaldyrmai, eń aldymen balalaryńyzdyń jaǵdaiyn, olardyń bolashaǵyn oilańyzdar», – dep jazdy Lázzat Raqysheva.
