"Qyrǵyzstannyń ulttyq qaýipsizdik qyzmetiniń tergeý izoliatorynda qamaýda otyrǵan burynǵy prezident Almazbek Atambaevtyń densaýlyǵy nasharlady" dep habarlady onyń advokaty Zamir Jooshev.
18 aqpanda Atambaevpen kezdesken kezde eks-prezident advokatqa qan qysymynyń tómendegenin aitqan.
"Kezdesý kezinde qan qysymy 76/60-qa túsip ketkenin aitty. Ótken aptada qan qysymy 90/60 bolǵan. Dárigerler kún saiyn qan qysymyn tekserip, aityp otyrýshy edi. Biraq sońǵy kezde jasyryp júr" dedi Zooshev.
Táýelsiz dárigerlerdiń aitýyna qaraǵanda mundai tómen qan qysymynyń saldarynan adam insýlt, infarkt alýy múmkin. Qyrǵyzstannyń memlekettik ulttyq komiteti ázirge Almazbek Atambaevtyń densaýlyǵyna bailanysty túsinikteme bermedi.
Byltyr tamyzdyń 7-8 kúnderi Shý oblysy Alamýdýn aýdanyndaǵy Koi-Tash aýylynda "Almazbek Atambaevty tergeýge májbúrlep jetkizý" operatsiiasy kezinde kúshtik qurylymdar men saiasatker jaqtastary arasynda qaqtyǵys boldy. Aýyr jaralanǵan bir arnaiy jasaq ókili kóz jumdy, birneshe adam zardap shekti. 200-den astam adam túrli jaraqat aldy. 8 tamyzda Almazbek Atambaev pen jaqtastary bilikke óz erkimen berildi.
Atambaevty ustaǵannan keiin oǵan "Jemqorlyq" jáne "Qylmysqa qatysý" jáne ózge de baptar boiynsha aýyr aiyptar taǵyldy, sot sheshimimen tergeý abaqtysyna qamaldy. Atambaev - qylmystyq top jetekshisi Aziz Batýkaevtyń zańsyz bosap shyǵýy týraly iste de negizgi aiyptalýshylardyń biri.
