Qyrǵyzstannyń burynǵy prezidenti Almazbek Atambaevty 29 qarashada qylmystyq top jetekshisi Aziz Batýkaevty túrmeden zańsyz bosatý isi boiynsha sot otyrysyna alǵash ret májbúrlep jetkizdi. Bul týraly Atambaevtyń advokaty Sergei Slesarev habarlady.
"Májbúrlep ákeldi, biraq ol qarsylasqan joq. Qazir ol sot zalynda emes, kabinette otyr" dedi Slesarev Azattyqtyń Qyrǵyz qyzmetine.
Buǵan deiin Atambaev sot protsesine qatysýdan bas tartatyny týraly birneshe ret málimdegen. Sot tyńdaýy qazanda Atambaevtyń qatysýynsyzz bastalǵan.
Sotta qaralyp jatqan qylmystyq is aiasynda 63 jastaǵy Atambaevqa Qyrǵyzstan parlamenti depýtaty men politsiia qyzmetkerin óltirý siiaqty birneshe aýyr qylmysqa aiypty dep tanylyp, uzaq jylǵa sottalǵan Aziz Batýkaevty 2013 jyly túrmeden zańsyz bosatýǵa bailanysty aiyptar taǵylǵany týraly tamyzda sotta jariialanǵan.
2013 jyly 9 sáýirde Naryn qalasynyń soty dárigerlerdiń "jazylmaityn dertke shaldyqqan" degen qorytyndysy negizinde Aziz Batýkaevty túrmeden merziminen buryn bosatqan.
Qazir sot qarap jatqan qylmystyq is boiynsha birneshe burynǵy laýazymdy sheneýnik pen meditsina qyzmetkerlerine aiyptar taǵylǵan. Bul is boiynsha barlyǵy 19 kúdikti bolǵan. Burynǵy prezidenttiń advokaty Sergei Slesarevtiń Azattyqtyń Qyrǵyz qyzmetine aitýynsha, tergeý qujatynda 14 adam "qylmysqa qatysýshylardy áshkereleýge kómektesýge keliskender" dep kórsetilgen.
Atambaev ózine taǵylǵan aiyptardy joqqa shyǵaryp, moiyndaýdan bas tartqan. Eger sot ony aiypty dep tanysa, Atambaev 15 jylǵa deiingi merzimge bostandyǵynan aiyrylýy múmkin. Bishkektiń irgesindegi úiine ózin tergeýge májbúrlep jetkizý maqsatymen barǵan militsiia jasaǵyna jaqtastarymen birge eki kún boiy qarsylasqannan keiin Atambaev biyl 8 tamyzda ustalyp, qamaýǵa alynǵan. Oǵan deiin Ishki ister ministrligi úsh ret shaqyrǵanymen, burynǵy prezident tergeýge barýdan bas tartqan.
