Qytaida ómir boiyna sottalǵan qazaqstandyq Aqjarqyn Turlybaidyń advokaty qyzdyń anasyna jazǵan hatyn jariialady, - dep habarlaidy Tengrinews.kz tilshisi.
Advokat Suńqar Nurmaǵanbetovtiń aitýynsha, Aqjarqyn qazir Qytaida jazasyn ótep jatyr. Onyń saýda jasaýǵa, turaqty túrde otbasyna qońyraý shalyp turýǵa, sonymen qatar hat alyp, hatqa jaýap berýge múmkindigi bar ekenin aitty.
Zańger Aqjarqynnyń anasyna jazǵan hattarynyń birin jariialady.
"Aiaýly anashym. Otbasymmen birge bolýdy qanshalyqty armandaitynymdy bilseńiz ǵoi. Balalyq shaǵymdy, sizderdi qatty saǵyndym. Bilesiz be, bizdiń júregimiz bir-birimen tyǵyz bailanysty. Biz áli de jaqynbyz. Men otbasymyzdyń árbir múshesin saǵyndym jáne jaqsy kóremin. Sizden taǵy da hattar men fotolar kútemin. Súiispenshilikpen, qyzyńyz Aqjarqyn", - delingen ótken jyldyń 15 jeltoqsanyndaǵy hat mátininde.
Nurmaǵanbetov Aqjarqyn elge qashan oralady degen saýalǵa da jaýap berýge tyrysty.
"Qazaqstannyń sottalǵan azamattaryn berý 2015 jyly Beijińde qol qoiylǵan ekijaqty kelisimmen retteledi. Mundai kelisim barlyq elde joq. Bul fakt", - deidi Nurmaǵambetov.
Protsedýra kelesi qadamdardan turady:
- ómir boiy bas bostandyǵynan aiyrý jazasyn bas bostandyǵynan aiyrýǵa qaita qaraý týraly sheshim;
- QR Bas prokýratýrasyna sottalǵan azamattardy qaitarý týraly ótinishhat joldaý;
- QR Bas prokýratýrasynyń jáne Syrtqy ister ministrliginiń Qytai tarapymen sottalǵan azamattardy qaitarýdy júzege asyrý boiynsha ózara is-qimyly.
"Óte mańyzdy sát - jaza biyl qaita qaralýy múmkin. Osyǵan kúsh salýdamyz. Eń aldymen, bizge qoldaý bildirgen qazaqstandyqtarǵa alǵys aitamyn", - deidi Nurmaǵambetov.
Eske sala keteiik, qazaqstandyq Aqjarqyn Turlybai 2014 jyly naýryzda Gýanjoý áýejaiynda ustalǵan edi. Keiin ony ómir boiyna bas bostandyǵynan aiyrǵan bolatyn. Biraz ýaqyttan keiin sot úkimi joiylyp, is qaita qaraýǵa joldandy.
Aqjarqyn Turlybai sot úkimin bir jyldan beri kútip otyr. Maýsymda qazaqstandyq diplomattar Qytaida sottalǵan qazaqstandyq Aqjarqyn Turlybaidyń koloniiada ioga men aǵylshyn tilin úiretip júrgenin habarlady.
