Ádilet Zeineldiń anasy áleýmettik jelide taraǵan «20 million teńge ótemaqy retinde berildi» degen aqparattyń shyndyqqa janaspaitynyn málimdedi, dep habarlaidy ult.kz.
Onyń aitýynsha, atalǵan qarajat memleketten tólengen ótemaqy emes, marqumdy aqtyq saparǵa shyǵarý úshin halyq tarapynan jinalǵan aqsha bolǵan.
Áieldiń sózinshe, jinalǵan qarjynyń shamamen 10 million teńgesi kepilde turǵan Uldananyń kóligine rásimdelgen avtonesieni óteýge baǵyttalǵan. Qalǵan qarajattyń bir bóligi marqumnyń anasy men ápkesine berilip, jerleý rásimi men as berý shyǵyndaryna jumsalǵan.
«Otbasymyzdyń jeke qajetine bir tiyn da ketken joq. Barlyq chek pen túbirtek ózimde bar», – dedi ol.
Sondai-aq ol kóliktiń Uldananyń ata-anasyna tapsyrylǵanyn, al Ádiletke marqumnyń 2,3 million teńge kólemindegi zeinetaqy jinaǵy ǵana aýdarylǵanyn aitty.
Ádilet Zeinel de óz málimdemesinde otbasynyń eshqandai memlekettik ótemaqy almaǵanyn jáne baspana talap etpegenin jetkizdi.
«Eshqandai ótemaqy alǵan joqpyz ári talap ta etpedik. Óz páterim bar, eshkimnen eshteńe suraǵan emespiz», – dedi ol.
