Ádilet ministrligi Bilim jáne ǵylym ministrligine «diplom basyp shyǵaratyn» JOO-larǵa qatysty naqty usynystardy engizetin boldy, dep habarlaidy QazAqparat.
Eske sala ketsek, Ulttyq qoǵamdyq senim keńesiniń úshinshi otyrysynda QR Prezidenti Qasym-Jomart Toqaev diplom basyp bere beretin joǵary oqý oryndaryn jabý qajettigin aitqan bolatyn.
Osy máselege qatysty Ádilet ministrliginiń alqa májilisinde Nur-Sultan qalasy ádilet departamentiniń basshysy Alan Tilenshiev usynys bildirdi.
«Memleket basshysynyń Joldaýyn júzege asyrý aiasynda biz toqsan saiyn attestattaý ótkizemiz. Prezident óz sózinde «diplom basyp shyǵaratyn» JOO-lardyń jumysyn toqtatýdy tapsyrǵan edi. Osy attesttaý aiasynda biz Bilim jáne ǵylym ministrligimen jumys júrgizip, osyndai stýdentterdiń tizimin bergen durys bolar edi. Sebebi zańgerlik mamandyq týraly dym bilmeitin stýdentter de bar. Olardyń daiyndyǵy da óte nashar», - dedi Alan Tilenshiev
Óz kezeginde Ádilet ministri Marat Beketaev bul usynysty qoldap, Bilim jáne ǵylym ministrligine tiisti hat joldanatynyn málim etti.
