2020 jyly Ádilet ministrligine tirkelý úshin 9 partiia ótinim berdi. Bul týraly QR Ádilet ministri Marat Beketaev aitty, dep habarlaidy QazAqparat.
«2020 jyly 9 partiia tirkeý úshin ótinim berdi. Ózderińiz de biletindei, bul protsess 2 kezeńnen turady. Aldymen partiia qurǵysy keletin adamdar toby ótinim beredi. Eger bul ótinim talaptardyń barlyǵyna sai kelse 2 kezeńge jiberiledi jáne sezd ótkizip, qol jinaidy. Ótken jyly 9 ótinim túsip, olardyń altaýynyń qujattary zańnama talaptaryna sai kelmegendikten keri qaitaryldy. Olar barlyq kemshilikterin túzetip, ótinimderin qaitadan bere alady», - dedi ministr Zoom platformasynda ótken baspasóz máslihaty barysynda.
Onyń atap ótýinshe, olardyń barlyǵyna kemshilikterdi túzetý týraly habarlama jiberildi.
«Talaptarǵa sai kelgen úsh topqa da habarlama berdik. Olar endi sezd ótkizip, kelesi qujattar toptamasyn usynýy qajet. Adamdardyń bir toby sezd ótkizip, qujattar toptasyn berdi. Qazir atalǵan qujattardy tekserý júrip jatyr», - dedi Marat Beketaev.
Onyń aitýynsha, tirkeýge qujat usynǵan partiialardy ózge de memlekettik organdar tarapynan tekserý júrgiziledi. Al atalǵan partiialardy tirkeýge usynǵan tulǵalardy aty-jónderi qupiia.
«Jariia etýge quqymyz joq. Mundai aqparatty partiialardyń ózderi ǵana bere alady», - dedi ministr.
