Dúisenbi kúni keshke Qazaqstan fýtbol federatsiiasynyń Prezidenti Ádilbek Jaqsybekov shuǵyl jiyn ótkizip, Ádiletti oiyndy saqtaý komitetiniń otyrysyn uiymdastyrýdy usyndy, dep habarlaidy "Ult aqparat".
Federatsiianyń baspasóz qyzmetinen málim etkendei, jiynda qazaqstandyq birqatar fýtbolshynyń adal oiyn talaptaryn buzǵandyǵy talqylandy.
«Eń aldymen, ÝEFA-dan túsken aqparat týraly aityldy. Sport salasynda aqparat jinap, taldaý jasaityn Sportradar korporatsiiasy Eýropalyq fýtbol qaýymdastyǵyna qazaqstandyq kásipqoi fýtbol klýbtarynyń oiyndarynda sporttyq tartystyń qaǵidalary saqtalmaitynyn habarlaǵan. Sportradar korporatsiiasy - bás tigýde kúmándi málimetterdi taldaityn saraptamalyq uiym. Birinshi liga komandalary arasynda Qazaqstan Birinshiliginiń oiyndary sol málimetterge ilikken. «Aqtóbe» fýtbol klýbynyń janynan qurylǵan «Aqtóbe-Jas» jastar komandasynyń osy iske qatysy bar ekeni anyqtalǵan», - delingen taratylǵan habarlamada.
Jiynǵa «Aqtóbe» komandasynyń bas direktory Samat Smaqov ta shaqyrylǵan.
«Sonymen qatar, taldyqorǵandyq «Jetisý B» komandasynyń oiynshysynyń de osy iske qatysy bar ekeni anyqtaldy. Ádiletti oiyndy saqtaý komitetiniń otyrysy jaqyn arada ótedi», - dedi QR fýtbol federatsiiasynan.
Eske salsaq, osydan birneshe kún buryn Á.Jaqsybekov klýbtar men tóreshilerge úndeý joldap, ádil oiyn printsipterin qatań saqtaýǵa shaqyrǵan bolatyn.
Óz kezeginde «Aqtóbe» FK bas direktory Samat Smaqov klýb ókilderiniń kelisilgen matchtarǵa qatysqandyǵyn rastady. Onyń málimdemesi klýbtyń resmi saitynda ornalastyrylǵan.
«Ókinishke orai, men birneshe oiynshynyń kelisilgen matchtarǵa qatysqandyǵy týraly aqparatty rastaýǵa májbúrmin. Áńgime Birinshi jáne Ekinshi liga matchtary jaily. Osyǵan orai, barlyq «Aqtóbe» jankúierlerine qarata aitqym keledi. «Aqtóbe» emblemasyn tósine taǵyp júrgen fýtbolshylar kelisilgen machtarǵa qatysady degen úsh uiyqtasam túsime kirmepti. Bul men úshin úlken shok boldy.
Búgin Qazaqstan fýtbol federatsiiasynda boldym. Ol jaqta barlyq jaǵdaidan habardar, jiti baqylaýda ustap otyr. Qysqasy – bári «Jetisý-B» komandasynyń kapitanynan bastaldy. Ol «Aqtóbe-Jas» jáne «Aqtóbe-J» oiynshylarymen bailanysqa shyqqan, tipti osynda kelgen. Ózara birneshe kezdesý bolǵan. Bunyń bári Ýkraina eliniń adamdarynyń baqylaýynda bolǵan. Kúmán jaz bel ortasyna kelgen kezde týyndai bastaǵan edi. Biraq biz naqty bir dálel bolmaǵandyqtan eshqandai kiná arta almadyq. Qazirgi ýaqytta dálelder bar – oiynshylardyń óz kinálaryn moiyndap jazǵan túsiniktemeleri alyndy. Eń qynjyltatyny – osynyń bárin biz úlken senim artyp kelgen ózimizdiń jergilikti oiynshylarymyz jasady. Onyń ústine, klýbtyń dál osyndai qiyn kezeńinde olardyń osyndai las qadamǵa baryp otyrǵandary kóńilge úlken qaiaý túsiredi», - dedi S.Smaqov.
