Beijińdegi qysqy Olimpiadaǵa qatysyp jatqan qazaqstandyq short-trekshi Ádil Ǵaliahmetov baspasóz máslihatyn ótkizip, suraqtarǵa jaýap berdi, dep habarlaidy QazAqparat.
23 jastaǵy Ádil eresekter arasyndaǵy Olimpiadaǵa alǵash ret qatysyp, birinshi múmkindiginde-aq finalǵa joldama aldy. Keshe ol short-trekten 1500 metrge júgirip, 8-orynǵa taban tiredi.
Erteń sportshy 500 metrlik júgirý jarysyna qatysady.
«Sońǵy jyldary úlken eńbek atqardyq. Bizdiń Qazaqstanda short-trek damyp jatqanyn kórsettik. Barlyq jankúierlerge alǵys aitamyn. Áli de Instagramda, áleýmettik jelilerde barlyǵy jazyp, quttyqtap jatyr. Keshe bárin emotsiiamen aityp tastaǵan soń qazir aita qoiar jańalyǵym joq. Erteń bizde 500 metrlik jarys bolady, soǵan daiyndalyp jatyrmyz», - dedi Ǵaliahmetov ZOOM-konferentsiiasynda.
Sonymen birge, sportshy áli de tájiribe jinaqtaý keregin aitty.
«Meniń tájiribem jetpei qaldy dep oilaimyn, óitkeni short-trektiń óz erekshelikteri bar. Qarsylastar basyp ozǵanda úlken jyldamdyqpen óte shyǵady. Oǵan iliný úshin ózińe de jyldamdyqty arttyryp, sál shetke shyǵý kerek. Bálkim osyny jasaýǵa tájiribem jetpegen shyǵar, endi jyldamdyq arttyraiyn desem, meni basyp ozyp ketkender kóp boldy. Bári óz kezegimen jáne ár oiyn saiyn sheberligim shyńdala túsedi», - dedi sportshy.
Ádil Ǵaliahmetov 500 metrlik jarysta Denis Nikisha, Abzal Ájiǵaliev syndy óte jyldam balalar bar ekenin aitty.
«Olar keshe finalda bolǵan sportshylardan talai ozǵan. Búgin jattyǵý kezinde kóremiz, sońǵy jattyǵýymyzdy jasap, ózimizdiń qandai formada ekenimizdi tekseremiz jáne nátijesin erteń kórsetemiz dep oilaimyn», - dedi Ádil.
