Foto: Mańǵystaý oblysy ákimdiginiń baspasóz qyzmeti
25 qańtarda Aqtaýdaǵy Dostyq úiinde Ulttyq ziiatkerlik menshik institýtynyń, Aýyl sharýashylyǵy ministrligi men Ádilet ministrliginiń ókilderi «Asyl tuqymdy «Adai» jylqysy» zańdy tulǵalar men jeke kásipkerler birlestigine «Adai jylqysy» brendin paidalanýdyń airyqsha quqyǵyn rastaityn kýálik tabys etti. Osylaisha «Adai» tuqymdy qazaq jylqysynyń erekshe qasietteri endi zańdy túrde bekitildi, - dep habarlaidy "Ult aqparat" Mańǵystaý oblysy ákiminiń baspasóz qyzmetine silteme jasap.
2022 jyldyń qarasha aiynda Qazaqstan Prezidenti Qasym-Jomart Toqaev Mańǵystaý oblysyna jumys sapary barysynda adai jylqysyn derbes tuqym retinde ǵylymi tanýdy tapsyrǵan bolatyn.
«Ol úshin Mańǵystaýǵa Qazaq mal sharýashylyǵy jáne jem-shóp óndirý ǵylymi-zertteý institýtynyń mamandary keldi. Sarapshylar zamanaýi tehnologiialardy qoldana otyryp, jylqylardyń genetikalyq qurylymyn anyqtaý úshin olardy ǵylymi synaqtan ótkizdi», - delingen habarlamada.
Ulttyq ziiatkerlik menshik institýty direktorynyń orynbasary Aidyn Artyqova zertteý jumystarynyń nátijelerin eskere otyryp, qazaqtyń adai jylqysynyń erekshelikteri endi zańdy túrde qorǵalǵanyn aitty. Bul óz kezeginde jylqy ósirýshilerge adai jylqysy tuqymyn saqtaý, ósirý jáne nasihattaý úshin tiimdi bolmaq, sonymen qatar ulttyq oiyndardy, sonyń ishinde kókpar men báigeni nasihattaýǵa yqpal etpek.
«Ulttyq ziiatkerlik menshik institýty árqashan ulttyq brendterdiń qorǵalýy men saqtalýyn muqiiat qadaǵalaidy. «QazPATENT» geografiialyq ereksheligine qarai Almaty aportynan keiin «Adai» jylqysynyń tuqymyn patenttedi. Tuqymnyń jańashyldyǵy, ereksheligi men birtekitiligi, sonymen qatar ǵylymi, patenttik kriteriilerge sáikestik onyń ulttyq brendke ainalýyna múmkindik berdi. Airyqsha quqyqtardan basqa patent iesine 30 jyldyq qaýipsizdik merzimi beriledi. Patentter tek «Adai» tuqymyna ǵana emes, onyń 2 tipimen men 3 jelisine de berildi» - dedi Aidyn Artyqova.
