Arkanzas (AQSh) ýniversitetiniń matematika pániniń oqytýshysy Daniel Ýitmir adamzat balasy aldaǵy 100-500 jyl ishinde joq bolady dep paiymdap otyr. Onyń zertteý maqalasy International Journal of Astrobiology jýrnalynda jaqynda jaryq kórdi.
Ǵalymnyń oiynsha, million jyldan beri kele jatqan tehnologiialyq órkeniet óte sirek, adamdar – sonyń bireýi ǵana. Adam eń artta qalǵan tehnologiialyq damyǵan túrdiń biri bolýy múmkin. Óitkeni ǵaryshty baǵyndyrý jáne energiiany igerý sońǵy júz jylda ǵana iske asty ǵoi.
Adamzat – Jer betindegi tehnologiialyq turǵyda damyǵan birinshi túr. Adamnyń evoliýtsiiasyna jáne qazirgi mádenietttiń qalyptasýyna qansha ýaqyt qajet bolǵanyn eskersek, bizdiń ǵalamsharymyzda osyndai túrler 23 ret paida bolýy múmkin.
Degenmen sharttylyq printsipine sai, birneshe órkeniettiń birinen keiin biri bir ǵalamsharda paida bolýy ekitalai nárse. Bul degenińiz óz ǵumyrynyń sońynda adamzat biosferany ómir súrýge tipti jaramsyz etip tastaýy múmkin ekenin bildiredi.
Endi Jer betindegi tirshilik qashanǵa deiin sozylýy múmkin? Ýitmirdiń oiynsha, jerdegi tehnologiialyq órkeniet qashannan beri bar bolsa, adamzattyń sonsha ómiri ǵana qaldy. Iaǵni asyp ketse – júz jyl. Degenmen standartty aýytqý men keste assimetriiasyn eskersek, bul kórsetkish 500 jylǵa jetip qalýy da yqtimal.
JANKÚIER JUP
Londonnyń «Arsenal» komandasynyń jankúieri óz qalyńdyǵyna komandanyń kiim aýystyratyn bólmesinde sóz aitty. Ol «zeńbirekshiler» oinaityn «Emireits» stadionyna ekskýrsiia jasaýǵa qalyńdyǵymen birge kirgen.
Bozbala qyzǵa ilinip turǵan fýtbolkalardyń birin aýdaryp kórýdi ótindi. Qyz sony istemekke burylǵanda, ózi tizerlep otyryp qalyńdyǵynyń ne isteitinin kútti. Qyz sporttyq formany aýdaryp qalyp, «Maǵan turmysqa shyǵasyń ba, Rýt?» degen jazýdy kórdi de, qatty tańǵaldy. «O, qudaiym-ai!», – dedi ol qatty abyrjyp. Sosyn kútpegen usynysty dereý qabyl alatynyn uqtyrdy.
Osylaisha Djordan men Rýt esimdi jankúier ǵashyqtar «Emireits» stadionynan jup bolyp shyqty.
Mundai oqiǵa jii bolyp turady. Reseidiń «Rostov» komandasynyń qorǵaýshysy Ivan Novoseltsev te ǵashyǵyna oiynnan keiin jankúierler kóz aldynda tizerlep turyp kóńil bildirgen-di. Qazaqstan quramasynyń jartylai qorǵaýshysy Baýyrjan Islamhan da qalyńdyǵyna Almatynyń Ortalyq stadionynda usynys jasaǵany esimizde.
AShÝLY PILDEN SAQTAN!
Úndistanda ańshy jergilikti bilik organdarynyń ótinishimen eki shtatta 15 adamdy óltirgen pildi atyp tastady. Alyp haiýan 20-25 jas shamasynda bolǵan.
Ol naýryz aiynan beri Jarkhand shtatynda 11 adamdy óltirip, birneshe úidi talqandaǵan. Sondai-aq kórshi Bihar shtatynda da tórt turǵynnyń ómirin qiǵan.
Qanquily haiýandy Shafat Áli Khan esimdi ańshy atyp óltirdi. Áýeli ol pildi trankvilizatormen uiyqtatyp tastamaq bolǵan. Alaida dári áser etpei qoiǵan soń, Shafat oq jumsaýǵa májbúr bolypty. Jergilikti bilik osymen jetinshi ret ańshyǵa osyndai usynys jasap otyr. Ótken jyly ol eldiń ár bóliginde adam ómirine qaýip tóndirgen bes jolbarys pen segiz leopardty oqqa bailady. Úndistanda kún saiyn kem degende bir adam jabaiy janýarlardyń qurbany bolady eken.
"Jas Alash" gazeti
