Adamzat ótken ómir soqpaqtaryndaǵy shalt ketken qatelikterinen sabaq alýy tiis. Bul týraly búgin Álemdik jáne dástúrli dinder kóshbasshylary VI sezi aiasyndaǵy «Qubylmaly geosaiasi jaǵdaidaǵy dinder: adamzatty toptastyrý úshin jańa múmkindikter» atty sessiiasynda Qazaqstan Musylmandary dini basqarmasynyń tóraǵasy, Bas múfti Serikbaiqajy Oraz aitty, dep habarlaidy QazAqparat tilshisi.
«Ótkenimizge nazar salsaq, tarih qatparyndaǵy nebir qaraquiyn páleket, surapyl soǵys, kúrkireýik qaqtyǵystardyń oryn alýyna adam boiyndaǵy astamshyl piǵyl men daraqy dandaisýshylyq hám tákapparlyq pen ústemshildikke úiirsek qaraniettiń túrtki bolǵanyna kóz jetkizemiz. Adamzat balasynyń qasireti men qazabatyna - izgilikten bet buryp, adamshyldyq aq peiilden aýytqyp, áý bastaǵy dúniege kelýdegi murat-maqsattan ainýy, qaradúrsindik pen qatigezdikke boi aldyrýy áser etkeni talassyz shyndyq. Al, osyndai áleiim jurttyń janarynan qandy jas sorǵalatqan alapattardyń aldyn alý úshin adamzat ótken ómir soqpaqtaryndaǵy shalt ketken qatelikterinen sabaq alýy tiis. Osy turǵyda ǵalamdyq beibitshilikke úndegen kez kelgen izgi qadam, onyń ishinde dástúrli din jetekshileriniń suhbattastyq ornatýy adamzat balasyn tatýlyqqa úndeýi, adaldyq maqsat-múddesin tanyp bilýge ún qatysýy, sóz joq asa mańyzdy is-sharaǵa jatady», - dedi Serikbai qajy Oraz.
Onyń aitýynsha, tarihi kezeńderdegi alǵysharttardyń negizinde ulttar men ulystardyń áralýandyǵy qalyńdai túsip, dini nanymdardyń ózgeriske ushyrai bastaǵany belgili. Bul adamzattyń árkelki ómir súrý formasynyń qalyptasýyna sebep boldy. Sondai-aq túrli dini nanymdar - Jaratýshyny ózindik turǵyda tanytyp qana qoimai qoǵamdaǵy qatynas barysynda belgili bir ólshemder men qaǵdiattardy týǵyzdy. Osynyń negizindegi alajańqa kózqarastardan tarihta túrli qaishylyqtardyń oryn alǵanyn joqqa shyǵarýǵa bolmaidy. Áitkenimen adamzat balasyna keneýsiz talas-tartystan góri - tatýlyqta, syńar ezý ymyrasyzdan qaraǵanda yntymaqtastyqta ómir súrý asa qajet. Osy turǵydan alǵanda qazirgi tańda dini suhbattastyq pen dini tózimdiliktiń nasihaty aýadai qajet ekendigi barshaǵa túsinikti.
«Bizdiń kóregen kóshbasshymyz Nursultan Nazarbaev ǵalamdaǵy turaqtylyq pen beibitshilikti saqtap qalý úshin úshinshi myńjyldyqtyń basynda Astanada alǵash ret álemdik jáne dástúrli dinder jetekshileriniń quryltaiyn ótkizdi. Bul igi bastama áý degennen-aq óz údesinen shyǵyp, ómirsheń platforma ekenin áigilei aldy. Elordamyzǵa attai qalap shaqyrylǵan din kóshbasshylarynyń bes sezi ótti. Dini tanym túsinikteriniń ártúrli bolǵanyna qaramastan álemdik dini jáne rýhani jetekshilerdiń Astanada bas túiistirip, keleli máslihat ótkizýi álbette ǵalamdyq deńgeidegi úlken jetistik edi. Elbasymyz N.Nazarbaevtyń bul bastamasy álemdik jáne dástúrli dinderdiń beibit qarym-qatynasynyń altyn kópirine ainalǵany ámbege aian», - dedi elimizdiń Bas múftii.
Aita keteiik, Álemdik jáne dástúrli dinder kóshbasshylarynyń VI sezi keshe Elbasy Nursultan Nazarbaevtyń tóraǵalymen bastalǵan bolatyn. Alqaly jiynǵa barlyq álemdik jáne dástúrli dinderdiń ókilderi, sonymen qatar bedeldi dini liderler, saiasi qairatkerler men halyqaralyq uiym ókilderinen quralǵan 46 elden 82 delegatsiia qatysty.
Biylǵy jahandyq sharanyń basty jáne negizgi taqyryby - «Dini liderler qaýipsiz álem úshin».
