Adamdardyń birligi, olardyń izgi jáne shyn kóńilden bildirgen tilekteri Tuńǵysh Prezident Nursultan Nazarbaevqa kúsh berýde. Bul týraly Elbasynyń baspasóz hatshysy Aidos Úkibai aitty, dep habarlaidy QazAqparat.
A.Úkibai Elbasydan koronavirýstyń anyqtalýy týraly jańalyqtan týyndaǵan qoǵamdyq rezonansqa N.Nazarbaevtyń reaktsiiasy qalai bolǵanyn aityp ótti.
«Árine de, Nursultan Ábishuly mundai qoldaý sózderin kórip jáne estigennen – súisindi. Bibigúl Tólegenovanyń videosálemdemesin túsinistikpen jáne qýana qabyldaǵanyn aitty.
Elbasy ózge memleket basshylarynan bolsyn, kombinattardyń eńbek ujymdarynan bolsyn, túsip jatqan barlyq telegrammalar men hattardy oqidy. Nursultan Nazarbaev úshin hattardyń barlyǵy birdei qymbat. Adamdardyń birligi, olardyń izgi jáne shyn kóńilden bildirgen tilekteri Tuńǵysh Prezidentke kúsh berýde.
Osy jyldar boiy Kóshbasshymyz halyq qoldaýynyń arqasynda ǵana táýelsiz jáne gúldengen memleket qurý jolyndaǵy kez kelgen qiyndyqtar men aýyrtpalyqtardy jeńip keldi», - dedi A.Úkibai.
Sondai-aq ol Tuńǵysh Prezident búgin tańerteń Almaty oblysynda turatyn oqýshy bala Nazar Naǵashybektiń úndeýin oqyǵanyn aitty.
«Elbasy osy oqýshyǵa, barlyq qazaqstandyq jáne ózge memleket azamattaryna rizashylyq bildirip, jyly qoldaý sózderi úshin alǵys aitty. Árine, bul kúnderi Nursultan Ábishulynyń oqýshymen kezdesýi múmkin bolmas. Naǵashybek oqýdaǵy jetistikteri týraly aitqan eken. Sondyqtan Tuńǵysh Prezident qory jelisi boiynsha túrli baǵdarlamalarǵa qatysýǵa shaqyrtý alýy múmkin», - dep túiindedi baspasóz hatshy.
Aita keteiik, Elbasynyń baspasóz hatshysy Qazaqstannyń Tuńǵysh Prezidenti Nursultan Nazarbaevtyń COVID-19-ǵa tapsyrǵan synamasy oń nátije kórsetkenin habarlaǵan edi.
«Ai bastalǵaly Nursultan Nazarbaevtyń jumys kestesi óte tyǵyz boldy. Elbasy ekijaqty kelissózder júrgizip, resmi tulǵalardy qabyldady. Oǵan qosa, Tuńǵysh Prezident otandyq jáne sheteldik BAQ ókilderine suhbat berdi. Jalpy alǵanda televiziialyq túsirim úshin 40 adam jumys istedi, onyń ishinde shet eldiń azamattary da bar. Nursultan Nazarbaevtyń jaǵdaiyn meditsina qyzmetkerleri baqylap otyr. Alańdaýǵa negiz joq. Elbasy zamanaýi kommýnikatsiia arnalaryn paidalanyp qashyqtan jumys istep jatyr», - degen bolatyn A.Úkibai.
