Qazaq qoǵamynda adam qaitys bolǵan úide ainanyń betin jabý dástúri jii kezdesedi. Kópshilik muny eski yrym retinde qabyldaǵanymen, din ókilderi onyń belgili bir túsindirmeleri bar ekenin aitady, dep ult.kz tilshisi Malim.kz saityna silteme jasap habarlaidy.
Hasan Amanqul "Munara" gazetinde jariialanǵan maqalasynda bul ádettiń birneshe sebebine toqtalǵan.
Birinshiden, keibir musylmandar ainadaǵy beineni de sýretke uqsas nárse retinde qabyldaidy. Islamda úi ishinde sýretterdi shamadan tys ornalastyrmaýǵa qatysty túsinikter bar. Osyǵan bailanysty máiit jatqan bólmedegi ainany jabý da oryndy amal retinde qarastyrylady.
Ekinshiden, marqum jatqan bólmede Quran oqylyp, zikir men duǵa jasalýy múmkin. Mundai kezde adamnyń nazaryn basqa nársege buratyn zattardyń az bolǵany durys dep esepteledi. Ainadaǵy beine qulshylyq kezinde kóńildi bólýi yqtimal.
Úshinshiden, ainany jabýdyń taǵy bir máni – úige kirgen adamdy kúndelikti tirshilikten alystatyp, ómirdiń ótkinshiligin eske salý. Iaǵni mundai ortada adamnyń nazary syrtqy kelbetke emes, ólimnen ǵibrat alýǵa jáne aqyretti oilaýǵa baǵyttalǵany jón.
Tórtinshiden, adam ainaǵa qaraǵanda ádette óz beinesine, kiimine, bet-álpetine nemese basqa da syrtqy erekshelikterine nazar aýdarady. Qaiǵyly jaǵdai bolǵan úide mundai áreket orynsyz kórinýi múmkin.
Din ókilderi adam qaitys bolǵan bólmedegi ainanyń betin jabý shariǵatqa qaishy áreket emes ekenin aitady. Sonymen qatar munyń psihologiialyq jaǵy da bar.
«Adam balasy ainaǵa ár qaraǵan kezde osy aina arqyly kórgen burynǵy keiipter jadyna túse bastaidy. Al qarańǵy ýaqytta nemese kenet qaraǵan kezde ainada kórgen beineden adam shoshyp qalýy múmkin. Álbette mundai jaǵdailardyń adam psihikasyna keri áser tigizetini anyq. Sondyqtan qaitys bolǵan adam (máiit) jatqan bólmedegi ainanyń betin jabý – quptarlyq is ári shariǵatqa qaishy emes», – delingen QMDB taratqan túsindirmede.
