Prezident Qasym-Jomart Toqaev Adam quqyqtary jónindegi ýákil Elvira Ázimovany qabyldady, dep habarlaidy "Ult aqparat" Aqordaǵa silteme jasap.
Qasym-Jomart Toqaevqa Adam quqyqtary jónindegi ýákildiń 2021 jyly atqarǵan jumysynyń qorytyndylary, sonyń ishinde azamattardyń quqyqtaryn qaita qalpyna keltirýge kómektesý úshin qabyldanyp jatqan sharalar týraly málimet berildi.
Elvira Ázimova Memleket basshysyna sotqa deiingi tergeý satysynda onyń ishinde qańtar oqiǵasy aiasynda adam quqyqtaryn qorǵaý máseleleri jóninde baiandady. Sonymen qatar Prezidentke quqyq qorǵaý organdarynyń qyzmeti týraly zańnamany jetildirý, tótenshe jaǵdai rejimi kezinde adam quqyqtaryn qorǵaý jáne alqabiler sotynyń mandatyn keńeitý jóninde usynys berildi.
Adam quqyqtary jónindegi ýákilge Konstitýtsiialyq sotqa júginý quqyǵyn berý týraly Prezident bastamasy aiasynda ombýdsmen Memleket basshysyna Eýropa Keńesi Venetsiia komissiiasynyń usynystary jóninde jetkizdi. Atalǵan bastama Qasym-Jomart Toqaevtyń jýyrdaǵy Joldaýynda aityldy.
Elvira Ázimova Prezidentke adam quqyqtary salasyndaǵy ekinshi sharalar toptamasy boiynsha ázirlenip jatqan usynystardy tanystyrdy.
Kezdesý qorytyndysy boiynsha Qasym-Jomart Toqaev azamattardyń quqyqtaryn tiimdi qorǵaýdy qamtamasyz etýge baǵyttalǵan birqatar tapsyrma berdi. Memleket basshysy ýákildiń Bas prokýratýramen tyǵyz bailanysta bolyp, halyqqa tergeý nátijeleri týraly keńinen aqparat berý qajet ekenin atap ótti.
