Adam quqyqtary jónindegi ýákil Elvira Ázimova Bas prokýratýrany qańtar tragediiasyna bailanysty tergeýler boiynsha túsken anonimdi shaǵymdarǵa qulaq asýǵa shaqyrdy, dep habarlaidy QazAqparat.
«Habar-24» telearnasynda ótken brifingide Adam quqyqtary jónindegi ýákil eldegi Tótenshe jaǵdai rejimi kezinde qamaýǵa alynǵandardyń quqyqtary buzylǵanyn rastaityn derekter bar ekenin aitty.
«Azamattardyń quqyǵy buzylǵany týraly 39 ótinish tústi. Onyń 20-sy — azaptaý men qatygezdikke qatysty jazbasha túrde túsken ótinishter. Qalǵandary negizsiz qamaýǵa alý, ákimshilik jazalaý týraly sot sheshimderimen kelispeý, meditsinalyq kómek kórsetpeý, advokattardy jibermeý máselelerine qatysty», - dedi Elvira Ázimova.
Elvira Ázimova Atyraýdaǵy rezonansty jaǵdai boiynsha pikir bildire kelip, Bas prokýratýraǵa usynys tastady.
«Aitylǵan barlyq mán-jailardy jáne azamattardyń qylmystyq qýdalaýdan qorqatynyn eskere otyryp, Bas prokýratýraǵa naqty shaǵymdardyń túsýin kútpei, barlyq anonimdik túrde kelgen habarlamalardy, sondai-aq, áleýmettik jelidegi habarlamalardy tekserýdi bastaý kerek», -dedi Adam quqyqtary jónindegi ýákil.
