Astanadaǵy sotta IGIL*-dyń quramynda bolǵan 14 qazaqstandyqtyń isi qaralyp jatyr. 33 jastaǵy sottalýshy Amanjol Janseńgirov birinshi bolyp jaýap berdi. Ol prokýrordyń dáiekterine jaýap berdi, dep habarlaidy Sputnik Qazaqstan.
Túske deiingi otyrysta prokýror Edil Murat sottalýshylardyń Siriiadaǵy áreketteri jaiynda aita kele, qarýly qaqtyǵystan keiingi bir jaǵdaidy mysalǵa keltirdi. IGIL* terroristik uiymynyń músheleri jeńiliske ushyraǵan tórt adamnyń basyn kesip tastap, qala kósheleriniń birine jurt úreiin týdyrý maqsatynda jeti táýlikke tastap ketken.
"Terroristik top múshesi Janseńgirov osy bastardyń janynda turyp, onyń birin aiaǵymen basyp, qolyna atys qarýyn ustap turyp, sýretke túsken. Ol sýret ǵalamtor arqyly kópshilikke tarap ketken", - dedi prokýror.
Tústen keiingi otyrysta Amanjol Janseńgirov óz áreketin túsindirdi. Onyń sózine qaraǵanda, terroristik toptyń serkeleri jańa múshelerdi ádeii video men fotoǵa túsirip otyrǵan. Sóitip, óz eline qaitpasyn dep, ǵalamtorǵa júktep júrdi. Al video men fotoǵa túsýden bas tartatyndardy birden "tyńshy" dep, atý jazasyna kesken. Kóbisi óz balalary men áielderi úshin qoryqqan. Sol sebepti foto-videoǵa túsýge májbúr boldy.
"Sol kúngi qaqtyǵystan keiin kóp adam turyp, fotoǵa túsip jatty. Kóp adam turǵasyn, men de bardym. Ol jerdiń mentaliteti sondai, barlyǵy ólgen adamdarmen foto men videoǵa túsedi. Meniń qasymda áskeri ámir Sad boldy. Ol maǵan endi baryp sen tús dedi. "Nege?" dedim. Men seniń áskeri ámirińmin dep jaýap berdi. Aitqanymdy tyńda, bar tur dedi. Men turdym. Sosyn aiaǵyńdy qoi dedi. Aiaǵymdy qoidym. Qolyńdy kóter de, kúl dedi. Biraq men ol fotony internetke salǵan emespin. Olar óz telefondaryna túsirdi, artynan óshiremiz dedi", - dedi Janseńgirov.
