استاناداعى سوتتا يگيل*-دىڭ قۇرامىندا بولعان 14 قازاقستاندىقتىڭ ٸسٸ قارالىپ جاتىر. 33 جاستاعى سوتتالۋشى امانجول جانسەڭگٸروۆ بٸرٸنشٸ بولىپ جاۋاپ بەردٸ. ول پروكۋروردىڭ دەيەكتەرٸنە جاۋاپ بەردٸ, دەپ حابارلايدى Sputnik قازاقستان.
تٷسكە دەيٸنگٸ وتىرىستا پروكۋرور ەدٸل مۇرات سوتتالۋشىلاردىڭ سيريياداعى ەرەكەتتەرٸ جايىندا ايتا كەلە, قارۋلى قاقتىعىستان كەيٸنگٸ بٸر جاعدايدى مىسالعا كەلتٸردٸ. يگيل* تەرروريستٸك ۇيىمىنىڭ مٷشەلەرٸ جەڭٸلٸسكە ۇشىراعان تٶرت ادامنىڭ باسىن كەسٸپ تاستاپ, قالا كٶشەلەرٸنٸڭ بٸرٸنە جۇرت ٷرەيٸن تۋدىرۋ ماقساتىندا جەتٸ تەۋلٸككە تاستاپ كەتكەن.
"تەرروريستٸك توپ مٷشەسٸ جانسەڭگٸروۆ وسى باستاردىڭ جانىندا تۇرىپ, ونىڭ بٸرٸن اياعىمەن باسىپ, قولىنا اتىس قارۋىن ۇستاپ تۇرىپ, سۋرەتكە تٷسكەن. ول سۋرەت عالامتور ارقىلى كٶپشٸلٸككە تاراپ كەتكەن", - دەدٸ پروكۋرور.
تٷستەن كەيٸنگٸ وتىرىستا امانجول جانسەڭگٸروۆ ٶز ەرەكەتٸن تٷسٸندٸردٸ. ونىڭ سٶزٸنە قاراعاندا, تەرروريستٸك توپتىڭ سەركەلەرٸ جاڭا مٷشەلەردٸ ەدەيٸ ۆيدەو مەن فوتوعا تٷسٸرٸپ وتىرعان. سٶيتٸپ, ٶز ەلٸنە قايتپاسىن دەپ, عالامتورعا جٷكتەپ جٷردٸ. ال ۆيدەو مەن فوتوعا تٷسۋدەن باس تارتاتىنداردى بٸردەن "تىڭشى" دەپ, اتۋ جازاسىنا كەسكەن. كٶبٸسٸ ٶز بالالارى مەن ەيەلدەرٸ ٷشٸن قورىققان. سول سەبەپتٸ فوتو-ۆيدەوعا تٷسۋگە مەجبٷر بولدى.
"سول كٷنگٸ قاقتىعىستان كەيٸن كٶپ ادام تۇرىپ, فوتوعا تٷسٸپ جاتتى. كٶپ ادام تۇرعاسىن, مەن دە باردىم. ول جەردٸڭ مەنتاليتەتٸ سونداي, بارلىعى ٶلگەن ادامدارمەن فوتو مەن ۆيدەوعا تٷسەدٸ. مەنٸڭ قاسىمدا ەسكەري ەمٸر ساد بولدى. ول ماعان ەندٸ بارىپ سەن تٷس دەدٸ. "نەگە?" دەدٸم. مەن سەنٸڭ ەسكەري ەمٸرٸڭمٸن دەپ جاۋاپ بەردٸ. ايتقانىمدى تىڭدا, بار تۇر دەدٸ. مەن تۇردىم. سوسىن اياعىڭدى قوي دەدٸ. اياعىمدى قويدىم. قولىڭدى كٶتەر دە, كٷل دەدٸ. بٸراق مەن ول فوتونى ينتەرنەتكە سالعان ەمەسپٸن. ولار ٶز تەلەفوندارىنا تٷسٸردٸ, ارتىنان ٶشٸرەمٸز دەدٸ", - دەدٸ جانسەڭگٸروۆ.
