Foto: primeminister.kz
Premer-Ministr Álihan Smaiylov «24KZ» telearnasyna bergen suhbatynda 2024 jyly biznesti tekserýge moratorii alynyp tastalǵannan keiin qazaqstandyq kásipkerlerdi ne kútip turǵany týraly aitty, dep habarlaidy "Ult aqparat" primeminister.kz saityna silteme jasap.
Úkimet basshysy shaǵyn jáne orta biznes kez kelgen eldiń ekonomikasy men turaqtylyǵynyń negizi ekenin atap ótti. Sondyqtan memleket qolaily biznes-ortany qurýǵa úlken mán berip otyr.
«Biz biznes qaýymdastyqpen birlesip, kásipkerliktiń damýyna kedergi keltiretin shekten tys talaptardy anyqtaý boiynsha úlken jumys atqardyq. Nátijesinde 10 myńnan astam negizsiz talapty anyqtadyq. Búginde onyń 9 myńynyń kúshi joiyldy. Qalǵany keler jyldyń basynda Parlamentte tiisti zań qabyldanǵannan keiin alynyp tastalady», — dedi Álihan Smaiylov.
Onyń aitýynsha, táýekelderdi basqarý júielerin avtomattandyrý boiynsha da jumystar júrgizildi. Bul adami faktordy joia otyryp, tekserýlerdi josparlaýǵa múmkindik beredi. Nátijesinde olardyń sany 2 esege qysqarady. Jalpy zańǵa baǵynatyn kásipkerlerge ákimshilik qysym azaiady.
«Osylaisha, moratorii aiaqtalǵannan keiin elde jappai tekserýler bolmaýy kerek. Adal kásipkerlerdiń alańdaýyna esh negiz joq», — dedi Premer-Ministr.
Ol biznestiń problemalary ministrlikter men Úkimettiń túrli alańdarynda turaqty túrde jan-jaqty talqylanatynyn aitty. Olardyń kóbi sheshimin tapqan.
Úkimet basshysynyń aitýynsha, shaǵyn jáne orta biznestiń ekonomikadaǵy úlesi JIÓ-niń 36,5%-yna deiin ósti. Biyldyń ózinde munda jumyspen qamtylǵandar sany 500 myńǵa artyp, 4,3 mln adamǵa jetti. Ósý qarqyny shamamen 14% qurady.
«Bul rette bizdiń aldymyzda orta merzimdi perspektivada ShOB úlesin JIÓ-niń 40%-yna deiin arttyrý mindeti tur. Bul elimizdiń odan ári turaqty damýyna negiz bolady», — dep túiindedi ol.
