Abzal Súleimen: "Keńistiktegi kórkem oilarǵa talasyp..."

Ógei

Qyp-qyzyl kókjiek...

Ińirdiń eń jýas tolqyny soǵady.

Ózińde týyldym hám ózińde óldim dep,

Aitýǵa talpynǵam joq áli...

Sý betin sipaǵan – Ai sáýle tógedi,

Tolqynnyń ústinde qaýyrsyn qalqyp júr.

Oilarym tereńge shógedi,

Elesim maltyp júr.

Mysqyldap ushady shaǵala:

- O, Uly kól, dúr ala!

Ózińde týylǵan bul ógei balaǵa,

Qarǵystan ózgeni surama!

Áldene izdedim sharq uryp,

Áldekim úshin men soǵystym.

Sońy joq, úzilgen izdemin,

Basy joq joldarmen toǵystym.

Dirildek qamysqa tyǵyldym,

Qamystyń áýeni – jetimder!

Kókke ushqan kóldi ańsap jyǵyldym,

Meni de alyp ketińder! meni de alyp ketińder...

Ógei 2

Kókjiek qyzardy. Kún batty.

Taǵy únsiz...

Saýsaqpen syzdym Ai betindegi tyrtyqty.

Kúńgirt oilarym kirpiiaz Qudaiǵa jaǵymsyz,

Kúnáli piǵylym tynyshtyǵymdy úrkitti.

Bulqynasyń-aý, buira da buira tolqyndar,

Kúrsinesiń-aý jaǵaǵa qulap.

Ózińde týǵan ógeige janyń ashidy,

Bilem...

Eshteńe ózgermeidi biraq.

Sárýár tolqynnyń únsizdigine jarmasyp,

Ol kereń jáne men taǵy soqyrmyn.

Keńistiktegi kórkem oilarǵa talasyp,

Kókjiekte Qus Jolyn emip otyrmyn.

Jer-Ananyń demindei jyly samal jel,

Ótkennen kelgen habarshym!

Ińirde qalǵyp barady el,

Qai jaqqa ushyp barasyń?

Qai jaqqa ushyp barasyń?!

Jaǵada jatqan qorymǵa sozdym qolymdy,

(Bular áli de oiaý ma-ei?)

Bilmeimin búgin barymdy áste joǵymdy,

Túnekke jazdym atymdy qara boiaýmen.

Aidyny sheksiz, Uly kól!

Sen aitshy maǵan tarihty.

Kórsetshi maǵan, Táńir-aý!

Men nege áli zaǵippyn?

Ol áli nege sańyraý?

Boz jýsandardan estiled álsin qońyr án,

Kóz ushynda saǵymy –

Aiǵa órlep shyqqan kemeniń.

Kúbirlegen kóleńkelerdiń sońynan,

Besigimdi súirep kelemin...

Feniks

Terezege asyldy

Kún sáýlesi tym jasyq,

Kúnásindei ómirdiń sińip jatty qumǵa sý,

Qarańǵydan úzildi perishteniń sulbasy.

Bólme ishi qalǵydy tań atqanda arailap,

Sen usynǵan kúnániń tunbasyndai záhárdi,

Meniń kózsiz kóńilim simirýdi qalaidy-aq.

Tórt qabyrǵa syrtyna aiqailaidy shyndyǵym,

Seniń tániń kúń búgin,

Meniń janym qul búgin,

Qara oranǵan taǵdyrdyń qushaǵyna súńgidim.

Ǵazal ári ǵaryshtyq – sáýle men tán súiisi,

Kólbeńdeidi bólmede biiktikke talasyp,

Keńistikte ańqyǵan qushtarlyqtyń iisi.

Óksip shyqqan ózińnen ińkárlikke jýyndym,

Izgilikten shegindim,

Kórkemdikten bas tarttym.

Jassyz jylap qaldy ol,

Súmireigen sulbańdy ýata almai býyndym.

Ólip, qaita tirilip,

Kúlip, jylap jalyqqan,

Otqa oranyp qaitadan tura keldi tabyttan,

Esimsiz hám beinesiz ushyp ketti qalyqtap.

Ózgege!

Úrei

Sezinip úlgermei túsinem,

Kúrsinip úlgermei kúz demin.

Rýhaniiattardyń ishinen,

Ózimdi izdedim,

Ózgeni izdedim.

Adasqaq joldarǵa bet alyp,

O, qarsy aǵysqa tosamyn betimdi.

Jalqy batyrlarmen jeke alyp,

Qydyryp qoisa da etimdi,

Sabyrly kúiimdi saqtaǵym keledi!

Jattaǵym keledi ómirlik duǵalar.

Sodan soń kim maǵan senedi?

Kim meniń sózimdi qup alar?!

Kóne almai ózgeniń joǵyna,

Barynan qalǵan soń kóńilim.

Bir sáttik sezimder shoǵyna,

Órtenip ketkende ómirim,

Túsindim ózeksiz ekenin...

Maǵyna taba almai keń kúnnen,

Qarańǵy túnderge kóńilsiz jetemin...

Men kimmin?

***

O, meniń saǵynyshym kúzdegi,

O, meniń qily-qily peshenem.

Neshinshi jyl ótip jatqan sizdegi?

Neshinshi kúz sýret saldy kóshege?

Qai ýaqytta sýyp ketken qyrkúiek?

Qashan kóshe sýyq túsken boialǵan?

Janymdy kep qulatpady jyr súiep,

Tánimdi tek titirkentti oi, arman.

Kúz – saǵynysh!

Qaiaý berdi kóńilge,

O, egiz kúz qalaýyn tap syńardyń.

Muń men oidyń ortasy teń óńirde,

Bálkim osy kúzde óletin shyǵarmyn...

Qyrkúiekke nali berem nesine?

Jattatamyn áli kúzge atymdy.

Kim biledi, saqtap qalar esine,

Kóshe kezip júrgen myna aqyndy.