Tergeý izoliatoryna sottyń sanktsiiasymen túsken azamattardy azaptap jatqan joq. Bul týraly «Amanat» komsissiiasynyń tóraǵasy Abzal Quspan aitty, dep habarlaidy QazAqparat.
«Bizdiń tikelei mindetimizge kirmese de, tergeý izoliatoryna kirgen kezde shaǵym aitqan azamattardyń aryzdaryn jazyp alyp, ol boiynsha Bas prokýratýraǵa 4 bettik usynysymyzdy jetkizdik. Alǵashqy uryp-soǵý azaptaý jaǵdailary ustaý kezinde bolǵan. 5-6 qańtar jappai tártipsizdik bolsa, shamamen, 8, 9, 10 qańtar aralyǵynda jappai ustaý sharalary júrgizildi. Osy kezde sondai áreketke jol berildi, - dedi ol BAQ ókilderine arnalǵan brifing barysynda.
Onyń atap ótýinshe, ustalǵan kezde quqyq qorǵaý organdary tarapynan jábir kórgen azamattardyń isin prokýratýra men jemqorlyqqa qarsy qyzmet tekseredi. Almaty qalasy jáne ózge óńirlerde Antikor tarapynan ishki ister organdary qyzmetkerlerine qatysty qozǵaǵan qylmystyq ister bar.
«Taldyqorǵan qalasynda azamat Batyrbaevtyń qandai jaǵdaiǵa ushyraǵanyn táptishtep jazyp bergen bizdiń komissiia bolatynyn. Arqasyna útik basqanyn, qandai halde jatqanyn merzimderimen kórsettik. Ondai jaǵdailardy biz ashyq aittyq. Olarǵa qatysty Bas prokýratýra da áser etip, jumys istep jatyr. Qamaýǵa oq tiip jaraqat alǵan azamattardyń jaǵdaiy sol jerde jiti qaraldy. Biraq biz eń aldymen osyndai sanatty bosatý isterimen ainalystyq. Al tergeý izoliatoryna sottyń sanktsiiasymen túsken azamattardy azaptap jatyr dep aita almaimyz. Sebebi bizge túsken aryz-shaǵymdardyń barlyǵy ustaý kezinde bolǵanyn aitady, - dedi advokat.
