Táýelsiz zańger, advokat Abzal Quspan azamattarǵa 10 sotyq jer berýge qarsy ekenin aitty, dep habarlaidy Sputnik Qazaqstan tilshisi.
"Keibir adamdardyń kóńiline jaqpaýy múmkin, árine, biraq men 10 sotyq jer berýge óz basym qarsymyn. Nege? Sebebi barlyq azamat 10 sotyq jerdi qalalyq jerden, oblys ortalyǵynan alǵysy keledi, aýyldan jer berse, bas tartady. Konstitýtsiia, jer kodeksi boiynsha da 10 sotyq jer bárine tiesili. Biraq, "arhitektýralyq ansambl" degen uǵym bar. Qazir Almaty qalasyna baryp kórseńizder, Almaty jartylai qala, jartylai kolhoz deýge bolady. Óitkeni bireýler kottedj salady, bireý sala almai júredi. Sonyń saldarynan qalanyń beinesi, kórkemdigi, usqyny buzylyp bara jatyr. Qazir barlyq qala solai, bet-beinesi ózgerip ketti. Azamattardyń barlyǵy 10 sotyq jer alyp, jekemenshik úi salyp alýǵa áýes", — deidi advokat.
Quspan bul tusta shet elderdi úlgi etti.
"Bárimiz shet elderge shyǵamyz, ádemiligine tamsanyp qaitamyz. Elordamyz qalai ádemi salynyp jatyr?! Eger Astananyń jartysynan jer berip qoisaq, mynadai kelbetin kóre almaǵan bolar edik. Sondyqtan osyǵan bailanysty ózimniń qarsylyǵymdy aityp túsindirip jatyrmyn. Jeke úilerdi aýylda salý kerek", — degen pikirin bildirdi advokat jer zańyna bailanysty qoǵamdyq talqylaýda.
