تەۋەلسٸز زاڭگەر, ادۆوكات ابزال قۇسپان ازاماتتارعا 10 سوتىق جەر بەرۋگە قارسى ەكەنٸن ايتتى, دەپ حابارلايدى Sputnik قازاقستان تٸلشٸسٸ.
"كەيبٸر ادامداردىڭ كٶڭٸلٸنە جاقپاۋى مٷمكٸن, ەرينە, بٸراق مەن 10 سوتىق جەر بەرۋگە ٶز باسىم قارسىمىن. نەگە? سەبەبٸ بارلىق ازامات 10 سوتىق جەردٸ قالالىق جەردەن, وبلىس ورتالىعىنان العىسى كەلەدٸ, اۋىلدان جەر بەرسە, باس تارتادى. كونستيتۋتسييا, جەر كودەكسٸ بويىنشا دا 10 سوتىق جەر بەرٸنە تيەسٸلٸ. بٸراق, "ارحيتەكتۋرالىق انسامبل" دەگەن ۇعىم بار. قازٸر الماتى قالاسىنا بارىپ كٶرسەڭٸزدەر, الماتى جارتىلاي قالا, جارتىلاي كولحوز دەۋگە بولادى. ٶيتكەنٸ بٸرەۋلەر كوتتەدج سالادى, بٸرەۋ سالا الماي جٷرەدٸ. سونىڭ سالدارىنان قالانىڭ بەينەسٸ, كٶركەمدٸگٸ, ۇسقىنى بۇزىلىپ بارا جاتىر. قازٸر بارلىق قالا سولاي, بەت-بەينەسٸ ٶزگەرٸپ كەتتٸ. ازاماتتاردىڭ بارلىعى 10 سوتىق جەر الىپ, جەكەمەنشٸك ٷي سالىپ الۋعا ەۋەس", — دەيدٸ ادۆوكات.
قۇسپان بۇل تۇستا شەت ەلدەردٸ ٷلگٸ ەتتٸ.
"بەرٸمٸز شەت ەلدەرگە شىعامىز, ەدەمٸلٸگٸنە تامسانىپ قايتامىز. ەلوردامىز قالاي ەدەمٸ سالىنىپ جاتىر?! ەگەر استانانىڭ جارتىسىنان جەر بەرٸپ قويساق, مىناداي كەلبەتٸن كٶرە الماعان بولار ەدٸك. سوندىقتان وسىعان بايلانىستى ٶزٸمنٸڭ قارسىلىعىمدى ايتىپ تٷسٸندٸرٸپ جاتىرمىن. جەكە ٷيلەردٸ اۋىلدا سالۋ كەرەك", — دەگەن پٸكٸرٸن بٸلدٸردٸ ادۆوكات جەر زاڭىنا بايلانىستى قوعامدىق تالقىلاۋدا.
